നിപ ഉറവിടം; മൃഗങ്ങളിൽ നിന്നും സ്രവം ശേഖരിച്ച് ഭോപ്പാലിലേക്ക് അയക്കും

വവ്വാലുകളിൽ നിന്ന് സ്രവ സാമ്പിൾ ശേഖരിക്കാൻ മൃ​ഗസംരക്ഷണ വകുപ്പ് ഉദ്യോ​ഗസ്ഥർ ചാത്തമം​ഗലം പാഴൂരിൽ എത്തി. വീട്ടിലെ ആടിന്‍റെ രക്തവും സ്രവവും പരിശോധിക്കും.

കോഴിക്കോട്: സംസ്ഥാനത്ത് പന്ത്രണ്ട് വയസുകാരൻ നിപ ബാധിച്ച് മരിച്ചതിന് പിന്നാലെ വൈറസ് ഉറവിടം കണ്ടെത്താനുള്ള നടപടികൾ തുടങ്ങി. വവ്വാലുകളെ കണ്ടെത്തി സ്രവ സാമ്പിൾ ശേഖരിക്കാനായി മൃ​ഗസംരക്ഷണ വകുപ്പ് ഉദ്യോ​ഗസ്ഥർ ചാത്തമം​ഗലം പാഴൂരിൽ എത്തി.

സ്രവം സ്വീകരിച്ച് ഭോപ്പാലിലെ ലാബിൽ അയച്ച് പരിശോധിക്കാനാണ് തീരുമാനം. വീട്ടിലെ ആടിന്‍റെ രക്തവും സ്രവവും ശേഖരിക്കാനും തീരുമാനിച്ചിട്ടുണ്ടെന്ന് മൃ​ഗസംരക്ഷണ വകുപ്പ് ഡെപ്യൂട്ടി ഡയറക്‌ടർ കെ.കെ ബേബി പറഞ്ഞു.

More Read:നിപയുടെ മൂന്നാം വരവ്, ഉറവിടം ഇനിയും വ്യക്തമല്ല ; വൈറസ് അപകടകാരി

വവ്വാലുകളിൽ നിന്നും പന്നികളിൽ നിന്നുമാണ് നിപ വൈറസ് ബാധ പകരുന്നത് എന്നതിനാൽ രോ​ഗം സ്ഥിരീകരിച്ച മേഖലയിൽ കാട്ടുപന്നികളുടെ സാന്നിധ്യമുണ്ടോയെന്നും പരിശോധിക്കും. ഇതിനായി വനം വകുപ്പിന്‍റെ സഹായം തേടാനും തീരുമാനിച്ചിട്ടുണ്ട്. കൂടാതെ, റമ്പൂട്ടൻ സാമ്പിളുകളും ശേഖരിച്ചു.