കോട്ടയം: ശശി തരൂർ എംപിയ്ക്ക് കോട്ടയം ഈരാറ്റുപേട്ടയില്‍ കോണ്‍ഗ്രസ് എ ഗ്രൂപ്പ്‌ വേദിയൊരുക്കുന്നതില്‍ പ്രതികരിച്ച് മുതിര്‍ന്ന നേതാവ് തിരുവഞ്ചൂര്‍ രാധാകൃഷ്‌ണന്‍. ഈ പരിപാടിയെക്കുറിച്ച് തനിക്കറിയില്ല. താനുമായി ആലോചിച്ചിട്ടല്ല ഇങ്ങനെയൊരു പരിപാടി നടത്തുന്നതെന്നും അദ്ദേഹം കോട്ടയത്ത് പറഞ്ഞു.
കോട്ടയത്തെ യൂത്ത് കോണ്‍ഗ്രസ് പരിപാടിക്കെതിരെ തിരുവഞ്ചൂര്‍ രാധാകൃഷ്‌ണന്‍
പാർട്ടിയുടെ ചട്ടക്കൂടിനുള്ളിൽ നിന്നുകൊണ്ട് എല്ലാവരും മുന്നോട്ടുപോവണം. പ്രാദേശികമായുള്ള തർക്കങ്ങൾ മൂലം തരൂരിനെ ആയുധമാക്കാൻ ശ്രമിച്ചാൽ ജനങ്ങൾ അത് തിരിച്ചറിയും. യൂത്ത് കോൺഗ്രസ് സംസ്ഥാന നേതൃത്വം പോലും അറിഞ്ഞാണ് പരിപാടി എന്ന് കരുതുന്നില്ല. തരൂരിനെ യോഗത്തിൽ വിളിക്കുന്നതിൽ പരാതി ഇല്ല. ഏതെങ്കിലും പക്വതയില്ലാത്ത വ്യക്തിക്ക് ഉണ്ടാകുന്ന കൈ പിഴയാണ് പാർട്ടി നിലപാട് എന്ന് കരുതരുതെന്നും അദ്ദേഹം പറഞ്ഞു.