കോട്ടയം:സംസ്ഥാനത്തിന്‍റെ സാംസ്‌കാരിക ഗാനം എല്ലാ സാംസ്‌കാരിക പരിപാടികളുടെയും ആമുഖ ഗാനമായി ആലപിക്കുന്നതിന് നടപടി സ്വീകരിക്കുമെന്ന് മന്ത്രി സജി ചെറിയാൻ. 'ജയ ജയ കോമള കേരള ധരണി...' എന്ന വരിയില്‍ തുടങ്ങുന്നതാണ് ഈ ഗാനം. വൈക്കത്ത് കെ.എസ്.എഫ്.ഡി.സിയുടെ മൾട്ടിപ്ലക്‌സ് തിയേറ്ററിൻ്റെ ശിലാസ്ഥാപന ചടങ്ങിലായിരുന്നു സാംസ്‌കാരിക വകുപ്പ് മന്ത്രിയുടെ പ്രഖ്യാപനം.
സ്വാതന്ത്ര്യ സമരസേനാനിയും കവിയുമായ ബോധേശ്വരൻ രചിച്ച കവിത 2014ൽ സാംസ്‌കാരിക ഗാനമായി പ്രഖ്യാപിച്ചിരുന്നു. എന്നാല്‍, ഇത് ഒരു പരിപാടികളിലും പാടി കേട്ടിട്ടില്ലെന്ന് മന്ത്രി സജി ചെറിയാൻ പറഞ്ഞു. സാംസ്‌കാരിക മന്ത്രിയായിട്ട് 13 മാസമായി. നിരവധി പരിപാടികളിൽ പങ്കെടുത്തിട്ടും ഒരിടത്തും ഇത് കേട്ടില്ല.