കോട്ടയത്ത് ഗുണ്ടയെ കാപ്പ ചുമത്തി ജില്ലയിൽ നിന്നും നാടുകടത്തി

പൊലീസ് ഉത്തരവ് ലംഘിച്ച് കോട്ടയം ജില്ലയിൽ പ്രവേശിച്ചാൽ ഇയാൾക്ക് മൂന്ന് വർഷം വരെ തടവ് ശിക്ഷ ലഭിച്ചേക്കാം.

കോട്ടയം:വധശ്രമം, കഠിന ദേഹോപദ്രവം തുടങ്ങിയ ഗുരുതര കുറ്റകൃത്യങ്ങളിൽ പ്രതിയായ ആളെ കാപ്പ ചുമത്തി നാടുകടത്തി. കല്ലറ വില്ലേജ് സ്വദേശിയായ കാന്ത് എന്ന ശ്രീകാന്തിനെയാണ് നാടുകടത്തിയത്.

ജില്ല പൊലീസ് മേധാവിയുടെ റിപ്പോർട്ടിന്‍റെ അടിസ്ഥാനത്തിൽ കൊച്ചി റേഞ്ച് ഡിഐജിയാണ് ശ്രീകാന്തിനെ ഒരു വർഷത്തേക്ക് കോട്ടയം ജില്ലയിൽ നിന്നും നാടുകടത്തി ഉത്തരവിറക്കിയത്. ഉത്തരവ് ലംഘിച്ചുകൊണ്ട് ജില്ലയിൽ പ്രവേശിക്കുന്നത് മൂന്ന് വർഷം വരെ തടവ് ശിക്ഷ ലഭിക്കാവുന്ന കുറ്റകൃത്യമാണ്.

കടുത്തുരുത്തി പൊലീസ് സ്റ്റേഷൻ പരിധിയിൽപ്പെട്ട കല്ലറ, മുട്ടാർ എന്നീ പ്രദേശങ്ങളിൽ 2012 മുതൽ കവർച്ച, ദേഹോപദ്രവം, കൊലപാതകശ്രമം, കടകളിലും വീടുകളിലും അതിക്രമിച്ചുകയറി ദേഹോപദ്രവമേൽപ്പിക്കുകയും വസ്‌തുവകകൾ നശിപ്പിക്കുകയും ചെയ്യുക തുടങ്ങിയ കുറ്റകൃത്യങ്ങളിൽ ഉൾപ്പെട്ടിട്ടുള്ളയാളും 2015-ൽ കാപ്പ നിയമപ്രകാരം തടവുശിക്ഷ അനുഭവിച്ചിട്ടുള്ളയാളുമാണ്.