കിറ്റ് കിട്ടിയപ്പോൾ ജനം അറിയാതെ വോട്ടു ചെയ്‌തു, കടം കൊണ്ട് മുടിഞ്ഞ സർക്കാരിനെ 3 കൊല്ലത്തിൽ കൂടുതൽ ജനം സഹിക്കില്ല: കെ മുരളീധരൻ

റബർ ബോർഡ് നിർത്തലാക്കിയാൽ സർക്കാർ കടകെണിയിലാകുമെന്നും റബർ കർഷകരുടെ ആവശ്യങ്ങൾ സർക്കാർ നടപ്പാക്കണമെന്നും കെ മുരളീധരൻ ആവശ്യപ്പെട്ടു

കോട്ടയം:റബ്ബർ കൃഷി കൂടി ഇല്ലാതായാൽ കേരളം വൻ കടക്കെണിയിലാകുമെന്ന് കെ മുരളീധരൻ എം പി. നിലവിൽ ദിനംപ്രതി കോടികൾ ആണ് സർക്കാർ വായ്‌പ വാങ്ങുന്നത്. കടം കൊണ്ട് മുടിഞ്ഞ സർക്കാരിനെ മൂന്ന് കൊല്ലത്തിൽ കൂടുതൽ ജനങ്ങൾ സഹിക്കില്ല. കിറ്റ് കിട്ടിയപ്പോൾ ജനം അറിയാതെ വോട്ടു ചെയ്‌തതാണ്. ഇപ്പോൾ കിറ്റുമില്ല, ക്ഷേമ പെൻഷനുമില്ലെന്നും കെ മുരളീധരൻ പറഞ്ഞു.

റബറിന് മിനിമം 250 രൂപ താങ്ങ് വില പ്രഖ്യാപിക്കുക, റബർ ബോർഡ് നിർത്തലാക്കാനുള്ള ശ്രമം ഉപേക്ഷിക്കുക, റബർ കർഷകർക്ക് സബ്‌സിഡി കുടിശിക നല്‍കുക തുടങ്ങിയ ആവശ്യങ്ങൾ ഉന്നയിച്ചു കൊണ്ട് ജില്ല കോൺഗ്രസ് കമ്മറ്റി കോട്ടയത്ത് റബർ ബോർഡ് ഓഫിസിനു മുന്നിൽ നടത്തിയ പ്രതിഷേധ ധർണ ഉദ്ഘാടനം ചെയ്യുകയായിരുന്നു കെ മുരളീധരൻ.

റബർ കൃഷി സർക്കാരിന് വരുമാനമായിരുന്നു. പ്രകടനപത്രികയിൽ പറഞ്ഞ സബ്‌സിഡിയും താങ്ങുവിലയും റബർ കർഷകർക്ക് നല്‍കണം. റബർ ബോർഡ് സ്വകാര്യ വ്യക്തികൾക്ക് നൽകാതെ പാർലമെന്‍റിന്‍റെ വിധേയത്വമുള്ള ബോഡിയാക്കി നിലനിർത്തണമെന്നും മുരളീധരൻ ആവശ്യപ്പെട്ടു. ആസിയാൻ കരാറിന്‍റെ പേരു പറഞ്ഞ് ഇറക്കുമതി കച്ചവടം നടത്തി എംഎൽഎ മാരെ വിലയ്‌ക്കെടുക്കുകയാണ് മോദിയെന്നും മുരളീധരൻ ആരോപിച്ചു.

ഡിസിസി പ്രസിഡന്‍റ് നാട്ടകം സുരേഷ് പ്രതിഷേധ ധർണയ്‌ക്ക് അധ്യക്ഷത വഹിച്ചു. നേതാക്കളായ തിരുവഞ്ചൂർ രാധാകൃഷ്‌ണൻ, കെ സി ജോസഫ്, ജോസഫ് വാഴക്കൻ, ടോമി കല്ലാനി, ഫിലിപ്പ് ജോസഫ്, പി ആർ സോന തുടങ്ങിയവർ പങ്കെടുത്തു.