കോട്ടയത്ത് പീഡനത്തിനിരയായ പതിനാലുകാരിയുടെ ഗർഭസ്ഥശിശു മരിച്ചു

മധ്യവയസ്‌കനായ ആൾ കാറില്‍ കൊണ്ടുപോയി മയക്കുമരുന്ന് നൽകി പീഡിപ്പിച്ചെന്നാണ് പെണ്‍കുട്ടി പൊലീസിന് നൽകിയ മൊഴി.

കോട്ടയം :പീഡനത്തിനിരയായ പതിനാലുവയസുകാരിയുടെ ഗർഭസ്ഥ ശിശു മരിച്ചു. നാലരമാസം പ്രായമുള്ള ഗര്‍ഭസ്ഥശിശുവാണ് മരിച്ചത്. രക്തസ്രാവത്തെത്തുടർന്ന് പെൺകുട്ടി മെഡിക്കൽ കോളജ് ആശുപത്രിയിൽ ചികിത്സയിലാണ്.

കോട്ടയം പാമ്പാടിയിലാണ് സംഭവം. മധ്യവയസ്‌കനായ ആൾ കാറില്‍ കയറ്റിക്കൊണ്ടുപോയി മയക്കുമരുന്ന് നൽകിയ ശേഷം പീഡിപ്പിച്ചെന്നാണ് പെണ്‍കുട്ടി പൊലീസിന് നൽകിയ മൊഴി.

ഇതിന്‍റെ അടിസ്ഥാനത്തില്‍ പോക്സോ നിയമപ്രകാരം പാമ്പാടി പൊലീസ് കേസെടുത്ത് പ്രതിക്കായി അന്വേഷണം ആരംഭിച്ചിട്ടുണ്ട്. കാഞ്ഞിരപ്പള്ളി ഡിവൈഎസ്‌പി കെ.എൽ. സജിമോന്‍റെ മേൽനോട്ടത്തിലാണ് അന്വേഷണം.

മരിച്ച ഗർഭസ്ഥശിശുവിന്‍റെ ഡിഎൻഎ സാമ്പിൾ ശേഖരിച്ചശേഷം ഇന്ന് (ചൊവ്വാഴ്‌ച) ഇൻക്വസ്റ്റ് നടപടികൾ പൂർത്തിയാക്കും.വയറുവേദനയെതുടർന്ന് ഞായറാഴ്‌ച അമ്മ കുട്ടിയെ പാമ്പാടി താലൂക്ക് ആശുപത്രിയിലെത്തിച്ചപ്പോഴാണ് ഗർഭിണിയാണെന്ന വിവരം അറിയുന്നത്.

ഗുരുതരാവസ്ഥയിലായിരുന്ന കുട്ടിയെ ഉടൻതന്നെ കോട്ടയം മെഡിക്കൽ കോളജ് ആശുപത്രിയിലെത്തിച്ചെങ്കിലും ഗർഭസ്ഥശിശു മരിക്കുകയായിരുന്നു.