സംശയ രോഗം : ഭർത്താവ് ഭാര്യയെ കമ്പിവടി ഉപയോഗിച്ച് അടിച്ചു കൊന്നു

സംഭവം കൊല്ലം ഇരവിപുരത്ത്. ജോലിക്ക് എത്താതിരുന്നതിനെ തുടര്‍ന്ന് നടത്തിയ അന്വേഷണത്തിലാണ് കൊല്ലപ്പെട്ട നിലയില്‍ മഹേശ്വരിയെ കണ്ടെത്തിയത്

കൊല്ലം:ഇരവിപുരത്ത് ഭർത്താവ് ഭാര്യയെ കമ്പിവടി ഉപയോഗിച്ച് മുഖത്ത് അടിച്ച് കൊലപ്പെടുത്തി. ഇരവിപുരം മാർക്കറ്റിന് സമീപം വാടകയ്‌ക്ക് താമസിക്കുന്ന മുരുകനാണ് ഭാര്യ മഹേശ്വരിയെ(28) കൊലപ്പെടുത്തിയത്. സംഭവത്തില്‍ മുരുകനെ പൊലീസ് അറസ്‌റ്റ് ചെയ്‌തു.

വസ്‌ത്രങ്ങൾ ഇസ്‌തിരി ഇട്ടു നല്‍കുന്ന ജോലിയാണ് ഇയാള്‍ക്ക്. അയല്‍വീട്ടില്‍ വീട്ടുവേല ചെയ്‌തു വരികയായിരുന്നു മഹേശ്വരി. ഇന്ന് ജോലിക്ക് എത്താതിരുന്നതിനെ തുടര്‍ന്ന് നടത്തിയ അന്വേഷണത്തിലാണ് കൊല്ലപ്പെട്ട നിലയില്‍ മഹേശ്വരിയെ കണ്ടെത്തിയത്.

സംഭവ സമയത്ത് ഇവരുടെ മക്കള്‍ സഹോദരിയുടെ വീട്ടിലായിരുന്നു. സംശയ രോഗിയായ മുരുകന്‍ മദ്യപിച്ചെത്തി മഹേശ്വരിയെ നിരന്തരം മര്‍ദിക്കാറുണ്ടായിരുന്നതായി മകള്‍ പറഞ്ഞു.