കാസർകോട്: ബൈക്കിൽ ഒറ്റയ്ക്ക് യാത്ര. കറങ്ങിയത് രാജ്യം മുഴുവനും നേപ്പാളും മ്യാന്മറും. കുട്ടിക്കാലം മുതലുള്ള യാത്രാസ്വപ്‌നത്തിന് ചിറകുവിരിച്ച് പറക്കുകയാണ് കാസർകോട് കുമ്പള സ്വദേശിനിയായ ഇരുപത്തിയൊന്നുകാരി അമൃത ജോഷി എന്ന റൈഡർ അമൃത. കേരളത്തിൽ നിന്ന് വടക്കു കിഴക്കൻ സംസ്ഥാനങ്ങളിലേക്ക് ഒറ്റയ്ക്ക് ബൈക്കിൽ യാത്ര ചെയ്‌ത ഏറ്റവും പ്രായം കുറഞ്ഞ സ്‌ത്രീയും അമൃതയാണ്.
ബൈക്കുകളും ദീർഘദൂര ബൈക്ക് യാത്രയും കുട്ടിക്കാലം മുതല്‍ അമൃത ജോഷിയുടെ ക്രെയ്‌സാണ്. പിതാവ് അശോക് ജോഷിയുടെ സ്വപ്‌നമായിരുന്നു മകൾ റൈഡർ ആകുക എന്നത്. രണ്ട് വർഷം മുമ്പ് അച്ഛൻ മരിച്ചെങ്കിലും മകൾ ആ സ്വപ്‌നം സാക്ഷാത്‌കരിച്ചു.
സ്‌കൂൾ മൈതാനമായിരുന്നു ബൈക്ക് സവാരിയുടെ കളരി. പതിനെട്ടാം വയസിൽ ലൈസൻസ് കിട്ടിയപ്പോൾ മനസ് മുഴുവൻ യാത്രയായിരുന്നു മനസിലെന്ന് അമൃത പറയുന്നു. അന്ന് മുതലെയുള്ള മോഹമാണ് ഇന്ത്യയുടെ വടക്ക് കിഴക്കൻ സംസ്ഥാനങ്ങളിലേക്ക് ബൈക്കിലേറി ഒറ്റക്കൊരു യാത്ര.
കോഴിക്കോട് നിന്നാണ് യാത്ര ആരംഭിച്ചത്. ഉത്തർപ്രദേശിൽ നിന്നും അപകടത്തിൽപ്പെട്ടു 10 ദിവസം ആശുപത്രിയിൽ കഴിഞ്ഞു. പ്രിയപ്പെട്ട കെടിഎം ഡ്യൂക്ക് 200 ബൈക്കും തകർന്നു.