കണ്ണൂരിൽ വയൽക്കിളി നേതാവ് സുരേഷ് കീഴാറ്റൂരിന്‍റെ വീടിന് നേരെ ആക്രമണം. കീഴാറ്റൂരിൽ വ്യാപകമായി കള്ളവോട്ട് ചെയ്തിട്ടുണ്ടെന്ന് സുരേഷ് കീഴാറ്റൂർ ആരോപിച്ചതിന് പിന്നാലെയാണ് ആക്രമണമുണ്ടായത്. ഇന്നലെ രാത്രി പത്ത് മണിയോടെയായിരുന്നു സംഭവം
കണ്ണൂർ കീഴാറ്റൂരിലെ 102-ാം നമ്പർ ബൂത്തിൽ 60 കള്ളവോട്ട് പോൾ ചെയ്തിട്ടുണ്ടെന്ന് ഫേസ് ബുക്കിലൂടെ സുരേഷ് ഇന്നലെ ആരോപണം ഉന്നയിച്ചിരുന്നു. തെരഞ്ഞെടുപ്പ് കമ്മീഷന്‍റെ ക്യാമറയിലെ ദൃശ്യങ്ങളിൽ കള്ളവോട്ട് രേഖപ്പെടുത്തിയത് പതിഞ്ഞിട്ടുണ്ടെന്നും സുരേഷ് പറഞ്ഞിരുന്നു.
ഇതിന് പിന്നാലെയാണ് രാത്രിയിൽ ആക്രമണം ഉണ്ടായത്. താൻ വീഡിയോ ഷെയർ ചെയ്തതിന് പിന്നാലെ സഖാക്കൾ കൂട്ടത്തോടെ വീട് വളഞ്ഞെന്നും സുരേഷ് കീഴാറ്റൂർ ഫേസ്ബുക്കിലൂടെ ആരോപിച്ചിരുന്നു