കണ്ണൂര്‍:ഭൂമി ഏറ്റെടുത്ത് കാൽ നൂറ്റാണ്ടായിട്ടും സഫലമാവാതെ പയ്യന്നൂർ പുതിയ ബസ് സ്റ്റാന്‍ഡ് നിർമാണം. ചതുപ്പ് സ്ഥലത്ത് സ്റ്റാന്‍ഡ് നിർമിക്കാൻ ഫണ്ട് കണ്ടെത്താൻ പയ്യന്നൂർ നഗരസഭയ്ക്ക് ഇതുവരെ സാധിക്കാത്തതാണ് നിര്‍മാണത്തിന് തടസമായത്. സ്വകാര്യ കമ്പനി നിര്‍മിച്ച് പ്രവര്‍ത്തിപ്പിച്ച ശേഷം സര്‍ക്കാരിന് കൈമാറുന്ന ബില്‍ഡ് ഓപ്പറേറ്റ് ആന്‍ഡ് ട്രാന്‍സ്‌ഫര്‍ ആയി നിര്‍മാണം നടപ്പിലാക്കാൻ പോലും സാധിക്കാത്ത സാഹചര്യമാണ് നിലവിലുള്ളത്.
1995ലാണ് പയ്യന്നൂർ പുതിയ ബസ് സ്റ്റാൻഡ് നിർമിക്കാൻ കൈപ്പാട്ട് പ്രദേശത്ത് സ്ഥലം കണ്ടെത്തിയത്. എന്നാല്‍, നിശ്ചിത പ്രദേശത്ത് ബസ് സ്റ്റാൻഡ് നിർമാണം പ്രായോഗികമല്ലെന്ന് പ്രതിപക്ഷം ചൂണ്ടിക്കാട്ടിയിരുന്നു. കൈപ്പാട് പ്രദേശം നഗരത്തിലെ പ്രധാന കേന്ദ്രത്തിൽ നിന്നും ദൂരെയായി സ്ഥിതി ചെയ്യുന്നതുകൊണ്ട് പ്രതിപക്ഷം പദ്ധതിക്കെതിരെ എതിർപ്പുമായി രംഗത്തെത്തി. കോടിക്കണക്കിന് രൂപ ഇതിനോടകം തന്നെ ചെലവഴിച്ചിട്ടുണ്ടെങ്കിലും നിർമാണ പ്രവൃത്തി എങ്ങുമെത്താത്ത സ്ഥിതിയിലാണ്.