ആര്‍എസ്എസ് കേന്ദ്രത്തിന് നേരെയുണ്ടായ ബോംബാക്രമണം; പൊലീസിന് സിപിഎം വിലങ്ങിടുന്നു: കെ.സുരേന്ദ്രൻ

രക്തസാക്ഷിഫണ്ടുൾപ്പെടെ തിരിമറി നടത്തിയതിലൂടെ പ്രതിസന്ധിയിലായ സിപിഎം അതിൽ നിന്നു ശ്രദ്ധ തിരിക്കുന്നതിന് വേണ്ടിയാണ് ഈ അക്രമം നടത്തിയിരിക്കുന്നതെന്നും ബിജെപി സംസ്ഥാന അധ്യക്ഷന്‍ ആരോപിച്ചു

കണ്ണൂര്‍:പയ്യന്നൂരിലെ ആര്‍.എസ്.എസ് കാര്യാലയത്തിന് നേരെയുണ്ടായ ബോംബേറില്‍ പ്രതികളെ പിടികൂടാതിരിക്കാന്‍ സിപിഎം പൊലീസിനെ വിലങ്ങു വച്ചിരിക്കുകയാണെന്ന് ബിജെപി സംസ്ഥാന അധ്യക്ഷന്‍ കെ. സുരേന്ദ്രൻ. സിപിഎമ്മിന്‍റെ താല്‍പര്യമനുസരിച്ചാണ് കേസ് അന്വേഷണത്തില്‍ പൊലീസ് ഇടപെടുന്നത്. രക്തസാക്ഷി ഫണ്ടുൾപ്പെടെ തിരിമറി നടത്തിയതിലൂടെ പ്രതിസന്ധിയിലായ സിപിഎം അതിൽ നിന്നു ശ്രദ്ധ തിരിക്കുന്നതിന് വേണ്ടിയാണ് ഈ അക്രമം നടത്തിയിരിക്കുന്നതെന്നും അദ്ദേഹം ആരോപിച്ചു.

ജനാധിപത്യവിരുദ്ധവും നിയമവാഴ്‌ചയുടെ തകർച്ചയുമാണ് ഇവിടെ പ്രകടമാകുന്നത്. സി.സി.ടി.വി ദൃശ്യങ്ങളിലൂടെ രണ്ട് ബൈക്കുകളിൽ വന്നവരാണ് അക്രമം നടത്തിയതെന്ന് വ്യക്തമാണ്. അവരെ നിഷ്പ്രയാസം കണ്ടെത്താൻ കഴിയുമായിരുന്നിട്ടും പൊലീസ് അതിന് തയ്യാറാവുന്നില്ല.

ഇവരെ പിടികൂടാൻ പ്രത്യേകിച്ച് ഒരു ഗവേഷണ ബുദ്ധിയും ആവശ്യവുമില്ല. സമീപത്തെ നിരീക്ഷണ കാമറ ദൃശ്യങ്ങൾ പരിശോധിച്ചാൽ തന്നെ കുറ്റവാളികളെ നിഷ്പ്രയാസം കണ്ടെത്താൻ കഴിയും. വളരെ ആസൂത്രിതവും നീചവുമായ അക്രമമാണ് ഇവിടെ നടന്നിരിക്കുന്നത്.

സ്വന്തം പാർട്ടിക്കാർ എകെജി സെന്‍ററിൽ ബോംബ് എറിഞ്ഞിട്ട് അവരെ ഇതുവരെ പിടിക്കാൻ ആയിട്ടില്ല. പൊലീസിനെയും സർക്കാർ സംവിധാനങ്ങളെയും എങ്ങനെയാണ് മുഖ്യമന്ത്രി കൈകാര്യം ചെയ്യുന്നതെന്ന് ഇതിൽനിന്ന് നമുക്ക് മനസിലാവും. കേസില്‍ മുഴുവന്‍ പ്രതികളെയും ഉടൻ വെളിച്ചത്തുകൊണ്ടുവരാൻ പൊലീസ് തയ്യാറായില്ലെങ്കിൽ ശക്തമായ ബഹുജന പ്രക്ഷോഭം സംഘടിപ്പിക്കുമെന്നും അദ്ദേഹം കൂട്ടിച്ചേര്‍ത്തു.