ഇ കെ നായനാർ സ്മാരക ലൈബ്രറി ഉദ്ഘാടനം ചെയ്തു

സങ്കീർണ്ണമായ വർത്തമാനകാലസാഹചര്യത്തിൽ മാധ്യമ പ്രവർത്തകർക്ക് റഫറൻസ് ലൈബ്രറി അനിവാര്യമാണെന്ന് കോടിയേരി പറഞ്ഞു.

കണ്ണൂർ: തലശ്ശേരി പ്രസ്സ് ഫോറത്തിന്‍റെ ആഭിമുഖ്യത്തിൽ ആരംഭിച്ച ഇ കെ നായനാർ സ്മാരക ലൈബ്രറി സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ ഉദ്ഘാടനം ചെയ്തു. മാധ്യമ രംഗത്തുള്ളവർക്ക് സാമൂഹ്യ പ്രതിബദ്ധതയുണ്ടാവണമെന്നും, വാർത്തകൾ സത്യസന്ധമായിരിക്കാൻ ഉറപ്പ് വരുത്തണമെന്നും കോടിയേരി ബാലകൃഷ്ണൻ പറഞ്ഞു.

വിവര സാങ്കേതിക വിദ്യകളുപയോഗിച്ച് വാർത്തകൾ സൃഷ്ടിക്കപ്പെടുന്ന കാലമാണിത്. എന്നാൽ അച്ചടി മാധ്യമങ്ങളോടുള്ള വിശ്വസ്തത ഇപ്പോഴും നിലനിൽക്കുന്നുണ്ട്. ഇന്നും കേരളത്തിൽ വായനക്കാർ വര്‍ധിക്കുകയാണ്. സങ്കീർണ്ണമായ വർത്തമാനകാല സാഹചര്യത്തിൽ മാധ്യമ പ്രവർത്തകർക്ക് റഫറൻസ് ലൈബ്രറി അനിവാര്യമാണെന്നും കോടിയേരി പറഞ്ഞു.

ചടങ്ങിൽ പ്രസിഡന്‍റ് അനീഷ് പാതിരിയാട് അധ്യക്ഷനായി. എ എൻ ഷംസീർ എംഎൽഎ, നഗരസഭാ ചെയർമാൻ സി കെ രമേശൻ, മുൻ മന്ത്രി കെ പി മോഹനൻ, അഡ്വ. കെ കെ രമേഷ്, മാധ്യമ പ്രവർത്തകരായ നവാസ് മേത്തർ, പൊന്ന്യം കൃഷ്ണൻ, സി സോമൻ, കാത്താണ്ടി റസാഖ് എന്നിവർ സംസാരിച്ചു. മാധ്യമ പ്രവർത്തകരുടെ മക്കളായ വിദ്യാർഥി പ്രതിഭകൾക്ക് ഉപഹാരങ്ങളും കോടിയേരി സമ്മാനിച്ചു.