കണ്ണൂര്‍: പയ്യന്നൂരില്‍ സിഐയുടെ വീടിനും സ്വകാര്യ വ്യക്തിയുടെ കാര്‍ ഷോറൂമിനും നേരെ ആക്രമണം. ചന്തേര സിഐ സുരേഷ് ബാബുവിന്‍റെ മൂരിക്കൊവ്വലുള്ള വീടിന് നേരെയും കിഴക്കുമ്പാട് സ്വദേശി കെകെ ഗണേഷിന്‍റെ ഉടമസ്ഥതയിലുള്ള കാര്‍ ഫോര്‍ യൂ ഷോറൂമിന് നേരേയുമാണ് ആക്രമണം ഉണ്ടായത്. വില്‍പനക്കായി വച്ച 14 കാറുകള്‍ അക്രമികള്‍ തകര്‍ത്തു. പെരുങ്കളിയാട്ടത്തിന്‍റെ സമാപന ദിവസമായ തിങ്കളാഴ്‌ച ക്രമസമാധന കമ്മിറ്റിയിലുണ്ടായ തര്‍ക്കമാണ് ആക്രമണത്തിന് പിന്നിലെന്നാണ് സൂചന.
ഒരു വിഭാഗം വളണ്ടിയര്‍മാരുമായി തുടക്കം മുതല്‍ ക്രമസമാധാന കമ്മിറ്റിയില്‍ തര്‍ക്കം നിലനിന്നിരുന്നു. തര്‍ക്കം പരിഹരിക്കുന്നതിനായി സംഘാടക കമ്മിറ്റിയിലുണ്ടായിരുന്ന സിഐ സുരേഷ് ബാബുവും ഗണേഷും ഇടപെടല്‍ നടത്തിയിരുന്നു. സിഐയുടെ വീട് അക്രമിച്ച സംഘം തന്നെയാണ് കാറുകള്‍ തകര്‍ത്തതെന്നാണ് സംശയിക്കുന്നത്. ഷോറൂമില്‍ പത്ത് ലക്ഷം രൂപയുടെ നാശനഷ്ടമുണ്ടായെന്ന് ഉടമ പയ്യന്നൂര്‍ പൊലീസിന് നല്‍കിയ പരാതിയില്‍ പറഞ്ഞു. പയ്യന്നൂര്‍ പൊലീസ് സംഭവസ്ഥലത്തെത്തി അന്വേഷണം ആരംഭിച്ചു. സംഭവസ്ഥലത്ത് നിന്നും പൊലീസിന് സിസിടിവി ദൃശ്യങ്ങള്‍ ലഭിച്ചിട്ടുണ്ട്. പ്രതികളെ കുറിച്ചുള്ള വ്യക്തമായ സൂചനകള്‍ ലഭിച്ചിട്ടുണ്ടെന്നും കേസ് രജിസ്റ്റര്‍ ചെയ്‌തതായും പയ്യന്നൂര്‍ എസ്ഐ ശ്രീജിത്ത് കൊടേരി പറഞ്ഞു.