കാത്തിരിപ്പ് കേന്ദ്രം കാടുകയറി നശിക്കുന്നു

പ്രദേശത്തെ കുടിവെള്ളക്ഷാമത്തിന് പരിഹാരം കാണുന്നതിനായി പഞ്ചായത്ത് നിര്‍മിച്ച കുഴല്‍കിണറും നാശത്തിന്‍റെ വക്കിലാണ്

ഇടുക്കി: പഞ്ചായത്ത് പണികഴിപ്പിച്ച കാത്തിരിപ്പ് കേന്ദ്രം കാടുകയറി നശിക്കുന്നു. പൂപ്പാറ-കുമളി പാതയോരത്ത് ചേരിയാര്‍ ടൗണിലാണ് ലക്ഷക്കണക്കിന് രൂപ മുടക്കി നിര്‍മിച്ച കാത്തിരിപ്പ് കേന്ദ്രവും കുഴല്‍കിണറും ജനങ്ങള്‍ക്ക് ഉപകാരമില്ലാതെ നശിക്കുന്നത്. ശാന്തമ്പാറ പഞ്ചായത്ത് പണികഴിപ്പിച്ച വെയിറ്റിങ് ഷെഡാണ് കാണാന്‍ കഴിയാത്ത വിധം കാടുകയറിയിരിക്കുന്നത്. ഇവിടം ഇഴജന്തുക്കളുടെ താവളമാണെന്നും നാട്ടുകാര്‍ പറയുന്നു.

ഇതോടൊപ്പം പ്രദേശത്തെ കുടിവെള്ളക്ഷാമത്തിന് പരിഹാരം കാണുന്നതിനായി പഞ്ചായത്ത് നിര്‍മിച്ച കുഴല്‍കിണറും നാശത്തിന്‍റെ വക്കിലാണ്. കുട്ടികളടക്കം അപകടത്തില്‍പെടാന്‍ സാധ്യതയുള്ള കുഴല്‍കിണര്‍ ഉപയോഗ്യമാക്കുകയോ മൂടുകയോ ചെയ്യുന്നതിന് നടപടി സ്വീകരിക്കണമെന്നും നാട്ടുകാര്‍ ആവശ്യപ്പെടുന്നു.