ഓണ വിപണിയില്‍ മലയാളിക്ക് കൈ പൊള്ളും, കുതിച്ചുയർന്ന് പച്ചക്കറി വില

ഓണവിപണിക്ക് ദിവസങ്ങൾ മാത്രം ബാക്കി നിൽക്കെ കേരളത്തിലെ പച്ചക്കറി വില കുത്തനെ ഉയരുകയാണ്. ഒരാഴ്‌ച മുമ്പുണ്ടായിരുന്ന വില ഇരട്ടിയായാണ് വർധിച്ചിരിക്കുന്നത്.

ഇടുക്കി : ഓണക്കാലമടുത്തതോടെ കേരളത്തിൽ പച്ചക്കറി വില കുതിച്ചുയർന്നു. ഓണവിപണി സജീവമാകുന്നതിന് മുൻപേ ഇരട്ടിയിലധികം വിലവർധനവാണ് ഉണ്ടായിരിക്കുന്നത്. മഴമൂലം അയൽസംസ്ഥാനങ്ങളിൽ പച്ചക്കറി കൃഷികൾ നശിച്ചതാണ് വില കൂടാന്‍ കാരണമെന്നാണ് വ്യാപാരികൾ പറയുന്നത്.

പച്ചക്കറി	പഴയ വില(രൂപയിൽ)	പുതിയ വില(രൂപയിൽ)
ബീന്‍സ്	50	110
പയർ	30	80
കാബേജ്	40	60
പച്ചയിഞ്ചി	60	90
ചെറുനാരങ്ങ	50	100
പച്ചമുളക്	40	80
കാരറ്റ്	45	80
കോവയ്‌ക്ക	40	70

തമിഴ്‌നാട്ടില്‍ നിന്നും പച്ചക്കറിയുടെ ലഭ്യത കുറഞ്ഞതാണ് വില വര്‍ധിക്കാന്‍ കാരണമെന്നാണ് വ്യാപാരികള്‍ പറയുന്നത്. എന്നാല്‍, ഓണക്കാലം ലക്ഷ്യമിട്ട് വന്‍ ലാഭക്കൊയ്ത്ത് നടത്തുന്നതിനുള്ള മൊത്ത വ്യാപാരികളുടെയും ഇടനിലക്കാരുടേയും നീക്കമാണ് വിലവര്‍ധനവിന് പിന്നിലെന്ന ആരോപണവും ശക്‌തമാണ്‌. ആദ്യഘട്ടം മുതല്‍ പച്ചക്കറി വിപണിയിൽ സര്‍ക്കാര്‍ ഇടപെടല്‍ ഉണ്ടാകണമെന്നാണ് ആളുകളുടെ ആവശ്യം.