ഇടുക്കി ഒഴുക്കൻ പാറയിൽ മീൻ പിടിക്കാൻ പോയ രണ്ട് യുവാക്കളെ കാണാതായി

ജോയിസ്, മനേഷ് എന്നീ യുവാക്കളെയാണ് ഇടുക്കി ജലാശയത്തിൻ്റെ ഭാഗമായ ഉപ്പുതറ കാക്കത്തോട് കെട്ടുചിറക്ക് സമീപം ഒഴുക്കൻ പാറയിൽ കാണാതായത്

ഇടുക്കി: ഇടുക്കി ജലാശയത്തിൻ്റെ ഭാഗമായ ഉപ്പുതറ കാക്കത്തോട് കെട്ടുചിറക്ക് സമീപം ഒഴുക്കൻ പാറയിൽ മീൻ പിടിക്കാനെത്തിയ മൂന്ന് യുവാക്കളിൽ രണ്ട് പേരെ കാണാതായി. മാട്ടുതാവളം കുമ്മിണിയിൽ ജോയിസ് (31) മനേഷ് (31) എന്നിവരെയാണ് ജലാശയത്തിൽ കാണാതായത്.

ചൊവ്വാഴ്‌ച വൈകിട്ട് 5.30 ഓടെയാണ് സംഭവം. ജലാശയത്തിൻ്റെ അരികിൽ നിന്ന് വല വീശുന്നതിനിടയിൽ ജോയിസ് കാൽ വഴുതി വെള്ളത്തിൽ വീണു. ജോയിസ് വെള്ളത്തിൽ താഴുന്നത് കണ്ട് മനേഷ് രക്ഷപെടുത്താൻ ജലാശയത്തിലേക്ക് ചാടുകയായിരുന്നു. മനേഷിന് ഇടയിൽ രക്ഷപെടാൻ അവസരം ഉണ്ടായിരുന്നുവെങ്കിലും സുഹൃത്തിനെ രക്ഷിക്കാൻ വീണ്ടും നീന്തുകയും ഇരുവരും വെള്ളത്തിൽ മുങ്ങിപ്പോകുകയായിരുന്നു.

ഒപ്പമുണ്ടായിരുന്ന രതീഷ് ബഹളം വെച്ചപ്പോഴാണ് നാട്ടുകാർ വിവരം അറിയുന്നത്. ഉടൻ തന്നെ നാട്ടുകാർ തിരച്ചിൽ ആരംഭിച്ചു. വാഹനം എത്താത്ത പ്രദേശമായതിനാൽ പൊലീസിനും ഫയർഫോഴ്‌സിനും വനപാലകർക്കും എത്തിപ്പെടാൻ ഏറെ ബുദ്ധിമുട്ടേണ്ടി വന്നു. രാത്രി 7.30 ഓടെ ഫയർഫോഴ്‌സ് എത്തി തിരച്ചിൽ ആരംഭിച്ചെങ്കിലും നല്ല നീരൊഴുക്കും മഴയുമുള്ളതിനാൽ ഇരുവരെയും ഇതുവരെ കണ്ടെത്താൻ സാധിച്ചിട്ടില്ല.