തകര്‍ന്ന റോഡില്‍ ചേമ്പ് നട്ട് സമരം
സേനാപതി വട്ടപ്പാറ-ആനച്ചാല്‍ റോഡിൽ ഇരുചക്ര വാഹനങ്ങളടക്കം അപകടത്തില്‍പെടുന്നത് നിത്യ സംഭവമായതോടെയാണ് നാട്ടുകാര്‍ പ്രതിഷേധവുമായി രംഗത്തെത്തിയത്.
ഇടുക്കി: സേനാപതി വട്ടപ്പാറ-ആനച്ചാല്‍ റോഡിന്‍റെ ശോചനീയാവസ്ഥക്ക് പരിഹാരം കാണണമെന്നാവശ്യപ്പെട്ട് ജനകീയസമിതി രൂപീകരിച്ച് നാട്ടുകാര്‍ രംഗത്ത്. തകര്‍ന്ന റോഡില്‍ ചേമ്പ് നട്ട് പ്രദേശവാസികള്‍ സൂചനാ സമരം സംഘടിപ്പിച്ചു. ഇരുചക്ര വാഹനങ്ങളടക്കം അപകടത്തില്‍പെടുന്നത് നിത്യ സംഭവമായതോടെയാണ് നാട്ടുകാര്‍ പ്രതിഷേധവുമായി രംഗത്തെത്തിയത്. സേനാപതി പഞ്ചായത്തിലെ വട്ടപ്പാറ നിവാസികള്‍ക്ക് പുറം ലോകവുമായി ബന്ധപ്പെടുന്നതിന് പ്രധാന ആശ്രയമായ റോഡാണിത്. വര്‍ഷങ്ങളായി തകര്‍ന്ന് കിടക്കുന്ന റോഡിലൂടെയാണ് നിരവധി സ്‌കൂള്‍ ബസുകളും മറ്റ് വാഹനങ്ങളും കടന്നുപോകുന്നത്. റോഡിലെ കുണ്ടും കുഴിയും മൂലം ഓട്ടോ അടക്കമുള്ള ടാക്‌സി വാഹനങ്ങൾ ഇതുവഴി കടന്നുവരാത്ത അവസ്ഥയാണ്. വലിയകുഴികളില്‍ വാഹനങ്ങൾ അപകടത്തില്‍ പെടുന്നതും നിത്യ സംഭവവമാണെന്ന് നാട്ടുകാര്‍ പറയുന്നു. അപകടങ്ങളും യാത്രാദുരിതവും വര്‍ധിച്ച സാഹചര്യത്തിലാണ് നാട്ടുകാര്‍ ജനകീയ സമതി രൂപീകരിച്ച് പ്രതിഷേധവുമായി രംഗത്തെത്തിയത്. വരും ദിവസങ്ങളില്‍ റോഡ് ഉപരോധമടക്കമുള്ള സമരങ്ങള്‍ക്ക് നേതൃത്വം നല്‍കുമെന്നും ജനകീയസമതി ഭാരവാഹികള്‍ പറഞ്ഞു.