ഇടുക്കി: പീരുമേട് സബ് ജയിലിൽ റിമാന്‍ഡിലിരിക്കേ പ്രതി മരിച്ച സംഭവത്തില്‍ നിര്‍ണായക സാക്ഷിമൊഴി. നാട്ടുകാര്‍ പിടികൂടിയ പ്രതിയെ പൊലീസില്‍ ഏല്‍പ്പിക്കുകയായിരുന്നെന്ന് ദൃക്‌സാക്ഷിയായ ആലീസ് പറഞ്ഞു. ഇതോടെ മരിച്ച രാജ്‌കുമാറിനെ ഓടിച്ചിട്ട് പിടിച്ചതാണെന്ന പൊലീസ് വാദം പൊളിയുകയാണ്. പൊലീസിന് കൈമാറുമ്പോള്‍ ഇയാള്‍ ആരോഗ്യവാനായിരുന്നെന്നും ആലീസ് പറഞ്ഞു.
നേരത്തെ ആശുപത്രിയില്‍ കൊണ്ടുവന്ന പ്രതി ഏറെ ഭയപ്പെട്ടിരുന്നുവെന്നും എഴുന്നേല്‍ക്കാന്‍ പോലും കഴിയാത്ത സ്ഥിതിയിലായിരുന്നു എന്നും നെടുങ്കണ്ടം ആശുപത്രിയിയിലെ ഡോക്ടര്‍മാര്‍ പറഞ്ഞിരുന്നു. ഇതിന് പിന്നാലെയാണ് പൊലീസിന്‍റെ വാദങ്ങൾ പൊളിയുന്ന സാക്ഷിമൊഴികൾ ഉയരുന്നത്. 16-ാം തീയതി പ്രതിയെ ജയിലിൽ എത്തിച്ചെന്ന് പൊലീസ് പറയുമ്പോൾ, 17 ന് പുലർച്ചെ 1.30 ന് ആണ് പ്രതിയെ ജയിലിൽ എത്തിച്ചതെന്ന് ജയിൽ സൂപ്രണ്ട് വെളിപ്പെടുത്തിയിരുന്നു.
മരിച്ച രാജ്‌കുമാറിന്‍റെ ശരീരത്തിൽ നിരവധി മുറിവുകൾ കണ്ടെത്തിയിരുന്നു. ഇത് എങ്ങനെ സംഭവിച്ചു എന്ന കാര്യത്തിൽ വ്യക്തതയില്ല. 21-ന് വളരെ അവശനായ പ്രതി പീരുമേട് താലൂക്കാശുപത്രിയിൽ വച്ച് രാവിലെ 10.15 ന് മരിക്കുകയായിരുന്നു. ആദ്യം ഹൃദയാഘാതമാണെന്ന് പറഞ്ഞ പോലീസ് പിന്നീട് ന്യുമോണിയ ബാധിച്ചതാണെന്ന് തിരുത്തി. കേസിൽ ഇതുവരെ എട്ട് പൊലീസുകാരെ സസ്പെന്‍റ് ചെയ്യുകയും, ഒമ്പത് പേരെ സ്ഥലം മാറ്റുകയും ചെയ്തിരുന്നു. ജില്ലാ പൊലീസ് മേധാവിയുടെ അന്വേഷണത്തിലാണ് നടപടി എടുത്തത്. ഡിവൈഎസ്‌പിയുടെ റിപ്പോർട്ട് കിട്ടിയ ശേഷം കൂടുതൽ പൊലീസുകാര്‍ക്കെതിരെ നടപടി ഉണ്ടായേക്കും.
