ഇടുക്കിയിൽ സർവേയ്‌ക്കെത്തിയ സംഘത്തെ ബാങ്ക് ഉദ്യോഗസ്ഥർ തടഞ്ഞു

കെഎസ്ഇബി ഉദ്യോഗസ്ഥരുടെ സാന്നിധ്യമില്ലാതെ പരിശോധന നടത്താൻ അനുവദിക്കില്ലെന്ന് ബാങ്ക് അധികൃതർ വ്യക്തമാക്കി

ഇടുക്കി: പൊന്മുടിയിൽ സർവേയ്‌ക്കെത്തിയ സംഘത്തെ ബാങ്ക് ഉദ്യോഗസ്ഥർ തടഞ്ഞു. ഹൈഡൽ ടൂറിസത്തിനായി ഇടുക്കി പൊന്മുടിയിൽ പാട്ടത്തിനു നൽകിയ പുറമ്പോക്ക് ഭൂമിയിലാണ് സർവേ സംഘം പരിശോധനക്കെത്തിയത്. ഇവരെയാണ് ബാങ്ക് പ്രസിഡൻ്റ് വി.എ കുഞ്ഞുമോൻ്റെ നേതൃത്വത്തില്‍ തടഞ്ഞത്.

പൊൻമുടി ഡാമിനടുത്തുള്ള 21 ഏക്കർ‌ ഭൂമിയാണ് കെഎസ്ഇബി രാജക്കാട് സർവീസ് സഹകരണ ബാങ്കിന് ഹൈഡൽ ടൂറിസത്തിനായി പാട്ടത്തിന് നൽകിയത്. ഈ ഭൂമിയിൽ ആണ് പ്രാഥമിക സർവേ നടത്തിയത്. കെഎസ്ഇബി ഉദ്യോഗസ്ഥരുടെ സാന്നിധ്യമില്ലാതെ പരിശോധന നടത്താൻ അനുവദിക്കില്ലെന്ന് ബാങ്ക് ഭരണസമിതി പറഞ്ഞു. തുടര്‍ന്ന് പരിശോധന നടത്താനാകാതെ റവന്യൂ സംഘം മടങ്ങി.

പ്രാഥമിക പരിശോധന മാത്രമാണ് ഇപ്പോൾ നടത്തുന്നതെന്ന് ഉദ്യോഗസ്ഥർ വ്യക്തമാക്കിയെങ്കിലും പരിശോധനയെ ബാങ്ക് അധികൃതർ എതിർത്തു. ഉടുമ്പൻചോല തഹസിൽദാറെ റവന്യൂ ഉദ്യോഗസ്ഥര്‍ വിവരം അറിയിച്ചു. ദൈവദ്യുതി ബോർഡിനെ നിയമാനുസൃതം അറിയിച്ച് പരിശോധനയുമായി മുന്നോട്ട് പോകുമെന്ന് റവന്യു ഉദ്യോഗസ്ഥർ വ്യക്തമാക്കി.