ഇടുക്കി: കട്ടപ്പനയില്‍ വയോധികയെ വീടിനുള്ളില്‍ മരിച്ച നിലയില്‍ കണ്ടെത്തിയ സംഭവത്തില്‍ ദുരൂഹത. കട്ടപ്പന കൊച്ചുപുരക്കല്‍ ജോര്‍ജിന്‍റെ ഭാര്യ ചിന്നമ്മയുടെ മൃതദേഹമാണ് വായില്‍ തുണി തിരുകിയ നിലയില്‍ ഇന്ന് രാവിലെ കണ്ടെത്തിയത്. ആഭരണങ്ങള്‍ മോഷണം പോയിട്ടുള്ളതായി ഭര്‍ത്താവ് ജോര്‍ജ് പൊലീസിന് മൊഴി നല്‍കി. മോഷണ ശ്രമത്തിനിടെ നടന്ന കൊലപാതകമാകാമെന്നാണ് സംശയം.
കട്ടപ്പനയിലെ വയോധികയുടെ മരണത്തിൽ ദുരൂഹത
ഇന്ന് രാവിലെയാണ് വീടിന്‍റെ താഴത്തെ നിലയില്‍ ചിന്നമ്മ മരിച്ച് കിടക്കുന്നത് ഭര്‍ത്താവ് ജോര്‍ജ് കാണുന്നത്. ജോര്‍ജിന്‍റെ ശബ്‍ദം കേട്ട് ഓടിക്കൂടിയ നാട്ടുകാരാണ് പൊലീസില്‍ വിവരമറിയിച്ചത്. മൃതദേഹം കാണുമ്പോള്‍ വായില്‍ തുണി തിരുകിയിരുന്നുവെന്നും വാതിലുകള്‍ പുറത്ത് നിന്ന് പൂട്ടിയിരുന്നതായും ഇയാള്‍ പൊലീസിന് മൊഴി നല്‍കിയിട്ടുണ്ട്.