ഇടുക്കി: പ്രളയ ദുരിതാശ്വാസ ഫണ്ട് വിതരണത്തിൽ വ്യാപക ക്രമക്കേട് നടത്തി ഇടുക്കി കാഞ്ചിയാർ ഗ്രാമപഞ്ചായത്ത്. പ്രളയബാധിതര്‍ക്ക് നല്‍കേണ്ട തുക അനർഹര്‍ കൈപ്പറ്റി. സമീപ പഞ്ചായത്തിൽ നിന്നുള്ളവർക്കുപോലും വഴിവിട്ട സഹായമാണ് പഞ്ചായത്ത് ഒരുക്കിയത്. സ്വകാര്യ വ്യക്തി സമർപ്പിച്ച വിവരാവകാശ രേഖയിലൂടെയാണ് ക്രമക്കേട് പുറത്തായത്. ഇടുക്കി അഞ്ചുരുളിയിൽ സ്ഥിരതാമസക്കാരനായ കുന്നിൽ വീട്ടിൽ സിബി ജോസഫിന്‍റെ വീടിന്‍റെ ഒരു ഭാഗം പൂര്‍ണ്ണമായും പ്രളയം മൂലമുണ്ടായ മണ്ണിടിച്ചിലിൽ തകർന്നിരുന്നു. ഇതിനുള്ള ധനസഹായം ലഭിക്കുന്നതിനായി അധികൃതരെ സമീപിച്ചപ്പോൾ മണ്ണിടിച്ചിലിന് ധനസഹായമില്ലെന്ന് പറഞ്ഞ് സിബിയെ മടക്കി അയച്ചു. തുടർന്ന് വിവരാവകാശ നിയമ പ്രകാരം സിബിക്ക് ലഭ്യമായ രേഖകളിലൂടെയാണ് പ്രളയബാധിതര്‍ക്കുള്ള സര്‍ക്കാര്‍ ധനസഹായം ലഭിച്ചവരില്‍ ഏറെയും അനർഹരാണെന്ന വിവരം പുറത്തുവന്നത്.
പ്രളയ ദുരിതാശ്വാസ ഫണ്ട് വിതരണത്തില്‍ ഇടുക്കി കാഞ്ചിയാര്‍ പഞ്ചായത്തില്‍ ക്രമക്കേട്: ഇടിവി ഭാരത് എക്സ്ക്ല്യൂസീവ്