ഇടുക്കി: ദേവികുളം താലൂക്കില്‍ നിർമ്മാണം പൂർത്തീകരിച്ച അസീസി വില്ല പ്രളയബാധിത കുടുംബങ്ങള്‍ക്ക് കൈമാറി. കൊച്ചി- ധനുഷ്‌ക്കോടി ദേശീയപാതയോരത്ത് മച്ചിപ്ലാവ് അസീസി പള്ളിയുടെ ഉടമസ്ഥതയില്‍ ഉണ്ടായിരുന്ന 30 സെന്‍റ് ഭൂമിയിലാണ് അസീസി വില്ല നിര്‍മ്മിച്ചിരിക്കുന്നത്. നിര്‍മ്മാണം പൂര്‍ത്തിയായ ഭവനങ്ങളുടെ ആശീര്‍വാദ കര്‍മ്മം ഇടുക്കി രൂപതാ മെത്രാന്‍ മാര്‍ ജോണ്‍ നെല്ലിക്കുന്നേല്‍ നിര്‍വ്വഹിച്ചു. പ്രളയബാധിതര്‍ക്ക് വീടുകള്‍ അനുവദിക്കുന്ന കാര്യത്തില്‍ സര്‍ക്കാര്‍ ഏര്‍പ്പെടുത്തിയ ചില മാനദണ്ഡങ്ങള്‍ അര്‍ഹരായ പല കുടുംബങ്ങളേയും പദ്ധതിക്ക് പുറത്ത് നിര്‍ത്തുന്നുണ്ടെന്ന് ചടങ്ങില്‍ പങ്കെടുത്ത ഇടുക്കി എം പി അഡ്വ. ഡീന്‍ കുര്യാക്കോസ് പറഞ്ഞു. മറ്റേതെങ്കിലും കാര്യങ്ങളിലൂടെ ഇത്തരം പ്രശ്‌നങ്ങള്‍ക്ക് പരിഹാരം കാണാന്‍ ശ്രമം ഉണ്ടാകണമെന്നും അദ്ദേഹം ആവശ്യപ്പെട്ടു.
പ്രളയബാധിതർക്ക് വീടുകള്‍ കൈമാറി