അടിമാലി മരംമുറി കേസ് : മുൻ റേഞ്ച് ഓഫിസർ ജോജി ജോൺ ചോദ്യം ചെയ്യലിന് ഹാജരായി

കഴിഞ്ഞ ദിവസം ജോജി ജോണിന്‍റെ മുൻകൂർ ജാമ്യപേക്ഷ തള്ളിയ സുപ്രീംകോടതി അന്വേഷണ ഉദ്യോഗസ്ഥന് മുന്നിൽ ഹാജരാകാൻ നിർദേശം നൽകിയിരുന്നു

ഇടുക്കി : അടിമാലി മരംമുറി കേസിൽ ഒന്നാം പ്രതി മുൻ റേഞ്ച് ഓഫിസർ ജോജി ജോൺ ചോദ്യം ചെയ്യലിന് ഹാജരായി. ജോജി ജോണിന്‍റെ മുൻകൂർ ജാമ്യപേക്ഷ തള്ളിയ സുപ്രീംകോടതി അന്വേഷണ ഉദ്യോഗസ്ഥന് മുന്നിൽ ഹാജരാകാൻ നിർദേശം നൽകിയിരുന്നു. അടിമാലി റേഞ്ച് ഓഫിസറായിരിക്കെ അടിമാലി മങ്കുവ പുറമ്പോക്ക് ഭൂമിയിൽ നിന്ന് തേക്ക് മരങ്ങൾ മുറിച്ച് കടത്തിയ കേസിലാണ് ജോജി ജോണിനെ പൊലീസ് ചോദ്യം ചെയ്യുന്നത്.

ജോജിയുടെ മുൻകൂർ ജാമ്യാപേക്ഷ സുപ്രീംകോടതി കഴിഞ്ഞ ദിവസം തള്ളിയിരുന്നു. കേസിലെ അന്വേഷണ ഉദ്യോഗസ്ഥന് മുന്നിൽ 3 ദിവസം ചോദ്യം ചെയ്യലിന് ഹാജരാകാനും കോടതി നിർദേശിച്ചു. തിങ്കൾ മുതൽ ബുധൻ വരെ രാവിലെ 11 മണി മുതല്‍ വൈകീട്ട് 5 മണി വരെ സ്റ്റേഷനില്‍ തുടരണമെന്നായിരുന്നു കോടതി നിര്‍ദേശം.

ഇതേതുടർന്നാണ് തിങ്കളാഴ്‌ച രാവിലെ വെള്ളത്തൂവൽ സ്റ്റേഷനിൽ അന്വേഷണ ഉദ്യോഗസ്ഥന് മുന്നിൽ ജോജി ജോൺ ഹാജരായത്. ചോദ്യം ചെയ്യലിന് ശേഷം അറസ്റ്റ് ചെയ്യണോ എന്ന് അന്വേഷണ ഉദ്യോഗസ്ഥന് തീരുമാനിക്കാം. പൊതുമുതൽ നശിപ്പിച്ചതിനും മോഷണത്തിനുമാണ് വെള്ളത്തൂവല്‍ പൊലീസ് ഇയാള്‍ക്കെതിരെ കേസെടുത്തത്.

അതേസമയം, താൻ മാസങ്ങൾ ആയി വേട്ടയാടപ്പെടുകയാണെന്നാണ് ജോജി ജോണിന്‍റെ ആരോപണം. നേര്യമംഗലം, അടിമാലി റേഞ്ചുകളിൽ വ്യാപകമായി മരംമുറിക്ക് അനുമതി നൽകിയതിന് ജോജിക്കെതിരെ രജിസ്റ്റർ ചെയ്‌ത രണ്ട് കേസുകളില്‍ ഹൈക്കോടതി മുൻകൂർ ജാമ്യം അനുവദിച്ചിരുന്നു.