കെട്ടിയിട്ട് കണ്ണില്‍ മുളകുപൊടി വിതറും; അഗതിമന്ദിരത്തിലെ പീഡനം തുറന്നുപറഞ്ഞ് അന്തേവാസികൾ

അന്തേവാസികളുടെ വാർധക്യപെൻഷനും, സർവീസ് പെൻഷനും ഉൾപ്പെടെ തട്ടിയെടുക്കുകയും ക്രൂരമായി മർദ്ദിക്കുകയും ചെയ്തതായി പറയുന്ന രാധ എന്ന അന്തേവാസിയുടെ ശബ്ദരേഖ പുറത്തുവന്നിട്ടുണ്ട്.

മൂവാറ്റുപുഴ : മൂവാറ്റുപുഴ നഗരസഭയിലെ ഭരണകക്ഷി കൗൺസിലർ പ്രസിഡന്‍റായ അഗതി മന്ദിരത്തില്‍ അന്തേവാസികൾക്ക് ക്രൂര പീഡനമെന്ന് പരാതി. സ്‌നേഹാലയം ട്രസ്റ്റിന്‍റെ അഗതി മന്ദിരത്തിലാണ് അന്തേവാസികളെ ശാരീകവും മാനസികവുമായി പീഡിപ്പിക്കുന്നതായി പരാതിയുള്ളത്. പീഡനം സഹിക്കവയ്യാതെ അന്തേവാസികളില്‍ ചിലർ സംഭവം വെളിപ്പെടുത്തിയതോടെയാണ് വിവരം പുറംലോകം അറിഞ്ഞത്. ഇതോടെ ട്രസ്റ്റിനെതിരെ നടപടിയെടുക്കണമെന്നും സ്‌നേഹവീടിന്‍റെ ചുമതല നഗരസഭ ഏറ്റെടുക്കണമെന്നും ആവശ്യപ്പെട്ട് യൂത്ത് കോൺഗ്രസ് നിയോജക മണ്ഡലം കമ്മിറ്റിയുടെ നേതൃത്വത്തിൽ നഗരസഭയിലേക്ക് മാർച്ച് നടത്തി.

അന്തേവാസികളുടെ വാർധക്യപെൻഷനും, സർവീസ് പെൻഷനും ഉൾപ്പെടെ തട്ടിയെടുക്കുകയും ക്രൂരമായി മർദ്ദിക്കുകയും ചെയ്തതായി പറയുന്ന രാധ എന്ന അന്തേവാസിയുടെ ശബ്ദരേഖ പുറത്തുവന്നിട്ടുണ്ട്. മറ്റൊരു അന്തേവാസിയെ പട്ടിക കൊണ്ടു തല്ലി ഗുരുതരമായി പരിക്കേല്‍പ്പിച്ചതായും പരാതിയുണ്ട്. കൈയും കാലും കെട്ടിയിടുക, കണ്ണിൽ മുളക് പൊടി വിതറുക തുടങ്ങിയ ശിക്ഷാമുറകൾ അഗതി മന്ദിരത്തില്‍ ഉണ്ടെന്നും അന്തേവാസികൾ വെളിപ്പെടുത്തി. സർവീസിൽനിന്നു വിരമിച്ചവർ, നോക്കാനാളില്ലാതെ ബന്ധുക്കൾ ഏല്‍പ്പിച്ചവർ, തെരുവിൽനിന്നു പൊലീസ് കണ്ടെത്തി കൈമാറിയവർ അടക്കം 24 പേരാണ് ഇവിടെ അന്തേവാസികളായുള്ളത്. എന്നാൽ ആരോപണം അടിസ്ഥാനരഹിതമാണെന്നും മാനസിക അസ്വാസ്ഥ്യമുള്ളവരെ കൂട്ടുപിടിച്ച് രാഷ്ട്രീയ മുതലെടുപ്പ് നടത്തുകയാണെന്ന് നഗരസഭാ ചെയർപേഴ്സസൺ ഉഷ ശശിധരൻ പറഞ്ഞു.