എറണാകുളം: പന്തീരാങ്കാവ് യുഎപിഎ കേസിൽ രണ്ടാം പ്രതി താഹാ ഫസൽ കൊച്ചി എൻഐഎ കോടതിയില് കീഴടങ്ങി. ഹൈക്കോടതി തിങ്കളാഴ്ച താഹയുടെ ജാമ്യം റദ്ദാക്കിയിരുന്നു. ഉടൻ കീഴടങ്ങാനും ഹൈകോടതി ഡിവിഷൻ ബെഞ്ച് നിർദേശിച്ചിരുന്നു. ഇതേത്തുടർന്നാണ് അഭിഭാഷകനോടൊപ്പമെത്തി താഹ കോടതിയിൽ കീഴടങ്ങിയത്. കേസിൽ താഹയുടെ പങ്കും വസതിയിൽ നിന്ന് പരിശോധനയിൽ പിടിച്ചെടുത്ത തെളിവുകളും കണക്കിലെടുത്താണ് കോടതി ജാമ്യം റദ്ദാക്കിയത്.
അതേസമയം ഹൈക്കോടതി വിധിക്കെതിരെ സുപ്രീം കോടതിയെ സമീപിക്കുമെന്ന് താഹ പറഞ്ഞു. കോടതി ജാമ്യം റദ്ദാക്കുമെന്ന് കരുതിയിരുന്നില്ല. ഹൈക്കോടതി എന്താണ് തനിക്കെതിരെ കണ്ടെത്തിയ തെളിവുകൾ എന്ന് അറിയില്ല. യുഎപിഎ നിയമത്തിനെതിരെ ജനങ്ങൾ പ്രതികരിക്കണമെന്നും താഹാ ഫസൽ പറഞ്ഞു.