എറണാകുളം: കളമശ്ശേരി മണ്ഡലത്തിലെ സ്‌കൂളുകളിൽ പ്രഭാത ഭക്ഷണം നൽകുന്ന 'പോഷക സമൃദ്ധം പ്രഭാതം' എന്ന പദ്ധതിക്ക് തുടക്കമായി. കരുമാലൂർ തട്ടാംപടി സെന്‍റ് ലിറ്റിൽ തെരാസസ് യു.പി സ്‌കൂളിൽ മന്ത്രി പി രാജീവ് പദ്ധതി ഉദ്ഘാടനം ചെയ്‌തു. സംസ്ഥാനത്തെ ഇത്തരത്തിലുള്ള ആദ്യ പദ്ധതിയാണിത്.
കുട്ടികളുടെ പ്രഭാത ഭക്ഷണത്തെകുറിച്ച് ഇനി ആശങ്കപെടേണ്ട; സ്‌കൂളുകളിൽ 'പോഷക സമൃദ്ധം പ്രഭാതം' പദ്ധതിക്ക് തുടക്കമായി
പല കുട്ടികളും രാവിലെ തിരക്കുമൂലം പ്രഭാത ഭക്ഷണം ഒഴിവാക്കുന്നവരാണെന്നും അതിനാൽ പോഷക സമൃദ്ധമായ ഭക്ഷണം കുട്ടികൾക്ക് ഉറപ്പു വരുത്തേണ്ടതാണെന്നും വ്യവസായ മന്ത്രി പി. രാജീവ് പറഞ്ഞു. കുട്ടികളുടെ മാനസികവും ബുദ്ധിപരവുമായ വികാസത്തിന് പോഷക സമൃദ്ധമായ പ്രഭാതഭക്ഷണം പ്രധാന പങ്കുവഹിക്കുന്നതായി നിരവധി പഠനങ്ങൾ ചൂണ്ടിക്കാണിച്ചിട്ടുണ്ട്. ഈ സാഹചര്യത്തിലാണ് സാർവത്രിക പ്രഭാതഭക്ഷണ പരിപാടി ആരംഭിക്കുന്നതെന്ന് മന്ത്രി പറഞ്ഞു.