എറണാകുളം: മുനമ്പത്ത് കടലിൽ ഫൈബർ വള്ളം മറിഞ്ഞ് കാണാതായ മത്സ്യത്തൊഴിലാളികളിൽ അവസാനത്തെയാളുടെ മൃതദേഹവും കണ്ടെത്തി. ആലപ്പുഴ സ്വദേശി രാജുവിന്‍റെ മൃതദേഹമാണ് ഇന്ന് ലഭിച്ചത് (Munambam Boat Accident- Body of Fourth Missing Person Found). അപകടം സംഭവിച്ച് അഞ്ചാമത്തെ ദിവസമാണ് നാലാമത്തെയാളെ കണ്ടെത്താൻ കഴിഞ്ഞത്. ശനിയാഴ്‌ച രണ്ട് പേരുടെയും ഞായറാഴ്‌ച ഒരാളുടെയും മൃതദേഹം കണ്ടെത്തിയിരുന്നു.
വൈപ്പിൻ സ്വദേശി ശരത്, മോഹനൻ എന്നിവരുടെ മൃതദേഹങ്ങളാണ് ശനിയാഴ്‌ച കണ്ടെത്തിയത്. വൈപ്പിൻ സ്വദേശി ഷാജിയെന്ന ത്വാഹയുടെ മൃതദേഹമായിരുന്നു ഞായറാഴ്‌ച കിട്ടിയത്. ഇവരുടെ മൃതദേഹങ്ങൾ ശനി, ഞായര്‍ ദിവസങ്ങളിലായി സംസ്‌കരിച്ചു. നേവി, കോസ്റ്റൽ പൊലീസ്, മത്സ്യത്തൊഴിലാളികൾ എന്നിവരുടെ നേതൃത്വത്തിലാണ് തെരച്ചിൽ പൂർത്തിയാക്കിയത്.
വ്യാഴാഴ്‌ച വൈകുന്നേരമാണ് മുനമ്പത്ത് വള്ളം മറിഞ്ഞ് ഏഴ് പേർ അപകടത്തിൽപ്പെട്ടത്. ഇതിൽ മൂന്നുപേരെ മത്സ്യത്തൊഴിലാളികൾ തന്നെ രക്ഷപ്പെടുത്തിയിരുന്നു. മാലിപ്പുറം സ്വദേശികളായ ബൈജു, മണിയൻ, ആലപ്പുഴ സ്വദേശി ആനന്ദൻ എന്നിവരാണ് രക്ഷപ്പെട്ടത്. വ്യാഴാഴ്‌ച വൈകുന്നേരം അഞ്ചു മണിയോടെ കടലിലുണ്ടായിരുന്ന ഒരു ബോട്ടിൽനിന്ന് മത്സ്യം എടുത്തുവരുകയായിരുന്ന ‘നന്മ’ എന്ന ഫൈബർ വള്ളമാണ് മുങ്ങിയത്. ശക്തമായ തിരയിൽപെട്ട് വള്ളം മറിയുകയായിരുന്നുവെന്നാണ് രക്ഷപ്പെട്ടവർ നൽകിയ വിവരം.