രാജവെമ്പാലയെ പിടികൂടി വനം വകുപ്പിന് കൈമാറി

ഭൂതത്താൻകെട്ട് ബോട്ട് ജെട്ടിക്ക് സമീപത്താണ് രാജവെമ്പാലയെ കണ്ടെത്തിയത്

എറണാകുളം: ഭൂതത്താൻകെട്ട് ബോട്ട് ജെട്ടിക്ക് സമീപത്ത് കണ്ടെത്തിയ രാജവെമ്പാലയെ നാട്ടുകാർ പിടികൂടി വനം വകുപ്പിന് കൈമാറി. ബോട്ട് ജെട്ടിക്ക് സമീപം വെള്ളത്തിൽ നീന്തിയ രാജവെമ്പാല പിന്നീട് കരയിലേക്ക് കയറുകയായിരുന്നു. തുടർന്ന് നാട്ടുകാരനായ ജോമോനും പരിസരവാസികളും പാമ്പിനെ പിടികൂടുകയായിരുന്നു.

ആറ് കിലോയിലധികം തൂക്കവും 12 അടി നീളവുമുള്ള ആൺ വർഗ്ഗത്തിൽപ്പെടുന്ന പാമ്പിനെ കോതമംഗലം ഫോറസ്റ്റ് ഡിവിഷനിലെ ജീവനക്കാർക്ക് കൈമാറി.