എറണാകുളം : കുന്നത്തുനാട് എംഎൽഎ പി വി ശ്രീനിജനെ ജാതീയമായി അധിക്ഷേപിച്ചെന്ന കേസിൽ സാബു എം ജേക്കബ് അടക്കമുള്ള പ്രതികളുടെ അറസ്റ്റ് തടഞ്ഞ് ഹൈക്കോടതിയുടെ ഇടക്കാല ഉത്തരവ്. അന്വേഷണ ഉദ്യോഗസ്ഥൻ ആവശ്യപ്പെടുന്ന പക്ഷം ചോദ്യം ചെയ്യലിന് ഹാജരാകാന്‍ സാബു എം ജേക്കബിന് കോടതി നിർദേശം നൽകി. ചോദ്യം ചെയ്യലിന്‍റെ പേരിൽ അനാവശ്യമായി ബുദ്ധിമുട്ടിക്കരുതെന്നും മാനസിക പീഡനം പാടില്ലെന്നും കോടതി വ്യക്തമാക്കി.
കേസ് ക്രിസ്‌മസ് അവധിക്കുശേഷം പരിഗണിക്കുന്നതിനായി മാറ്റി. അതുവരെയാണ് അറസ്റ്റ് തടഞ്ഞിരിക്കുന്നത്. ബഹിഷ്‌കരണം അപമാനിക്കലാണെന്ന് സർക്കാർ കോടതിയില്‍ അറിയിച്ചിരുന്നു. എന്നാൽ ബഹിഷ്‌കരണം പ്രതിഷേധ മാർഗമാണെന്ന് കോടതി ചൂണ്ടിക്കാട്ടി.