എറണാകുളം : കൊറോണ കാലത്തെ പിപിഇ കിറ്റ് അഴിമതിയില്‍ ലോകായുക്ത അന്വേഷണം തുടരാമെന്ന് ഹൈക്കോടതി. ലോകായുക്ത നടപടികൾ തടയണമെന്ന മുൻ ആരോഗ്യവകുപ്പ് സെക്രട്ടറി അടക്കമുള്ളവരുടെ ഹർജികൾ തള്ളിയാണ് ചീഫ് ജസ്റ്റിസ് അധ്യക്ഷനായ ഡിവിഷൻ ബ‌ഞ്ചിന്‍റെ ഉത്തരവ്. മുൻമന്ത്രി കെ കെ ശൈലജ അടക്കം 11 പേർ രണ്ടാഴ്‌ചയ്ക്കകം ലോകായുക്ത നോട്ടിസിന് മറുപടി നൽകണമെന്നും കോടതി നിർദേശിച്ചു.
കൊറോണ കാലത്ത് ടെൻ‍ഡർ ഇല്ലാതെ പിപിഇ കിറ്റ് അടക്കമുള്ള പ്രതിരോധ സാമഗ്രികൾ വാങ്ങിയതിൽ ക്രമക്കേടുണ്ടെന്ന പരാതിയിലാണ് ലോകായുക്ത അന്വേഷണം. കോൺഗ്രസ് നേതാവ് വീണ എസ് നായരുടെ പരാതിയിൽ മുൻ മന്ത്രി കെ കെ ശൈലജ, മുൻ ആരോഗ്യ വകുപ്പ് സെക്രട്ടറി രാജൻ ഖോബ്രഗഡെ എന്നിവര്‍ അടക്കമുള്ള 11 പേർക്ക് പ്രാഥമിക അന്വേഷണത്തിന്‍റെ ഭാഗമായി ലോകായുക്ത നോട്ടിസ് നൽകിയിരുന്നു.