തിരുവനന്തപുരം: പിരിച്ചുവിട്ട കെഎസ്ആർടിസി എംപാനൽ ഡ്രൈവർമാരെ ദിവസ വേതനാടിസ്ഥാനത്തിൽ നിയമിക്കും. സർവീസുകൾ മുടങ്ങാതിരിക്കാൻ ഡിപ്പോകൾക്ക് ആവശ്യാനുസരണം ഇവരെ ഉപയോഗിക്കാം. ഡ്രൈവർമാരില്ലാത്തതിനാൽ സർവീസുകൾ റദ്ദാക്കിയതിനെ തുടർന്നുണ്ടായ പ്രതിസന്ധിക്ക് ഇതോടെ പരിഹാരമാകും. കോടതി ഉത്തരവിനെ തുടർന്ന് 2107 എംപാനൽ ഡ്രൈവർമാരെ പിരിച്ചുവിട്ടതോടെ നിരവധി സർവീസുകളാണ് മുടങ്ങിയത്. ഉച്ചവരെ 390 സർവീസുകൾ കെഎസ്ആർടിസി റദ്ദാക്കി. തെക്കൻ മേഖലയെയാണ് പ്രതിസന്ധി കാര്യമായി ബാധിച്ചത്. ഇതോടെ പ്രതിസന്ധി പരിഹരിക്കുന്നതിന് സർക്കാർ നടപടി തുടങ്ങുകയായിരുന്നു. ഗതാഗത വകുപ്പ് സെക്രട്ടറി കെഎസ്ആർടിസി ഉന്നത ഉദ്യോഗസ്ഥരുമായി ചർച്ച നടത്തുകയും പിരിച്ചുവിട്ട എംപാനൽ ഡ്രൈവർമാരെ ദിവസ വേതനാടിസ്ഥാനത്തിൽ തിരിച്ചെടുക്കാന്‍ തീരുമാനിക്കുകയുമായിരുന്നു.
പിരിച്ചുവിട്ട എംപാനല്‍ ഡ്രൈവര്‍മാരെ ദിവസ വേതനാടിസ്ഥാനത്തില്‍ നിയമിക്കും
സർവീസുകൾ മുടങ്ങാതിരിക്കാൻ ഡിപ്പോകൾക്ക് ആവശ്യാനുസരണം ഇവരെ ഉപയോഗിക്കാം
പ്രതിസന്ധി അവസാനിക്കുന്നു ; പിരിച്ചുവിട്ട കെഎസ്ആർടിസി എം പാനൽ ഡ്രൈവർമാരെ ദിവസ വേതനാടിസ്ഥാനത്തിൽ തിരിച്ചെടുക്കും
അഞ്ചോ അതില്‍ അധികമോ വര്‍ഷം പ്രവർത്തിപരിചയമുള്ളവരെയാണ് ദിവസ വേതനാടിസ്ഥാനത്തിൽ നിയമിക്കുക. പ്രവർത്തിപരിചയം കൂടുതലുള്ളവർക്ക് മുൻഗണന നൽകും. കോടതി ഉത്തരവനുസരിച്ച് 180 ദിവസത്തിൽ കൂടുതൽ കെഎസ്ആർടിസിയിൽ താല്‍കാലിക ജോലിയിൽ തുടരാനാകില്ല. അതിനാൽ 179 ദിവസത്തേക്കാകും നിയമനം. അതേ സമയം ഇവർക്ക് യാത്രാ പാസും മറ്റ് ആനുകൂല്യങ്ങളും ലഭിക്കില്ല. നേരത്തെ പിരിച്ചുവിട്ട എംപാനൽ കണ്ടക്ടർമാരെയും സമാന രീതിയിലാണ് നിയമിച്ചത്.