ആലപ്പുഴ: ആലപ്പുഴ വീയപുരത്ത് പരാതി നൽകാനെത്തിയ യുവാവിനെ പൊലീസ് മർദിച്ചതായി പരാതി. വീയപുരം സ്വദേശി അജിത് പി വർഗീസാണ് പൊലിസ് മർദിച്ചെന്നാരോപിച്ച് കായംകുളം ഡിവൈഎസ്പിക്ക് പരാതി നൽകിയത്. മർദനത്തിൽ പരിക്കേറ്റ അജിത്ത് ഹരിപ്പാട് താലൂക്കാശുപത്രിയിൽ ചികിത്സ തേടി.
വീയപുരം എസ്ഐ സാമുവലിനെതിരെയാണ് യുവാവ് പരാതി നൽകിയത്. തൻ്റെ പിതൃസഹോദരനെ അയൽവാസി മർദിച്ച സംഭവവുമായി ബന്ധപ്പെട്ട് പരാതി നൽകിയിരുന്നു. ജൂലൈ 24ന് നൽകിയ പരാതിയുടെ രസീത് ചോദിച്ച് ജൂലൈ 25ന് സ്റ്റേഷനിൽ എത്തിയപ്പോഴായിരുന്നു സംഭവം.