ആലപ്പുഴ:അടഞ്ഞു കിടന്ന വീട് കുത്തിത്തുറന്ന് സ്വർണാഭരണങ്ങളും വിലപിടിപ്പുളള വാച്ച് ശേഖരങ്ങളും പണവും കവർന്ന കേസില്‍ ഉത്തർപ്രദേശിലെ ബിജിനൂർ ജില്ലയിലെ കുഗ്രാമമായ ശിവാലകാലായിൽ നിന്ന് പ്രതിയെ പിടികൂടി കേരള പൊലീസ് (Thieves Arrested From Uttar Pradesh). ആലപ്പുഴ ജില്ലയിലെ മാന്നാർ പൊലീസ് സ്റ്റേഷൻ പരിധിയിലാണ് മോഷണം നടന്നത്. മോഷണ സംഘത്തിലെ പ്രധാനിയായ സുൽഫിക്കറിനെയാണ് (34) ഉത്തർപ്രദേശിലെ (Uttar pradesh) ബിജിനൂർ (Bijnor) ജില്ലയിലെ കുഗ്രാമമായ ശിവാലകാലായിൽ നിന്നും പിടികൂടിയത്. (Mannar Police Arrested Thieves From Uttar Pradesh)
അന്വേഷണം തുടങ്ങിയത് ഇങ്ങനെ: മോഷണം നടന്ന രണ്ട് വീടുകളിലെയും സിസിടിവി മോഷണത്തിന് ശേഷം ഇളക്കിയെടുത്ത് കൊണ്ടുപോയതിനാൽ ആദ്യ ഘട്ടത്തില്‍ പൊലീസിന് തെളിവൊന്നും ലഭിച്ചിരുന്നില്ല. തുടർന്ന് സംഭവസ്ഥലത്ത് നിന്നും ശാസ്ത്രീയ തെളിവുകൾ ശേഖരിച്ചാണ് അന്വേഷണം ആരംഭിച്ചത്. ഇതിന്‍റെ അടിസ്ഥാനത്തിൽ മോഷണം നടത്തിയ പ്രതികൾ ഉത്തരേന്ത്യക്കാരാണെന്ന് പൊലീസ് സംഘം സ്ഥിരീകരിച്ചു. തുടർന്ന് പ്രത്യേക അന്വേഷണ സംഘം ന്യൂഡൽഹിയിലെത്തി കൂടുതൽ വിവരങ്ങൾ ശേഖരിച്ച് പ്രതികളെ പിടികൂടുന്നതിനായി യുപി പൊലീസിന്‍റെ സഹായം തേടി.
പ്രതികൾ മോഷണം, പിടിച്ചുപറി, കൊലപാതകം അടക്കമുളള കേസുകളില്‍ ഉൾപ്പെട്ടവരാണെന്നും പ്രതികളില്‍ ഒരാളെ യുപി പൊലീസ് (Uttar pradesh police) അടുത്തിടെ എൻകൗണ്ടറിൽ കൊലപ്പെടുത്തിയതാണെന്നും വിവരം ലഭിച്ചു. തുടർന്ന് യുപി പൊലീസിനൊപ്പം നടത്തിയ പരിശോധനയില്‍ കരിമ്പിൻ തോട്ടത്തില്‍ നിന്ന് നാട്ടുകാരുടെ എതിർപ്പ് മറികടന്നാണ് പ്രതിയെ പിടികൂടിയത്.