ശ്രീമഹേഷുമായി പൊലീസ് തെളിവെടുപ്പ് നടത്തി ആലപ്പുഴ: അച്ഛൻ മകളെ മഴുകൊണ്ട് വെട്ടി കൊലപ്പെടുത്തിയ കേസില്‍ പൊലീസ് പുറത്തുവിട്ടത് ഞെട്ടിക്കുന്ന വിവരങ്ങൾ. ജൂണ്‍ ഏഴിന് വൈകിട്ടാണ് ആലപ്പുഴ ജില്ലയിലെ മാവേലിക്കരയില്‍ അച്ഛൻ മകളെ മഴു കൊണ്ട് വെട്ടിക്കൊലപ്പെടുത്തിയത്. ആറു വയസുകാരി നക്ഷത്രയാണ് കൊല്ലപ്പെട്ടത്.
കേസില്‍ മാവേലിക്കര സ്വദേശി ശ്രീമഹേഷിനെ പൊലീസ് കസ്റ്റഡിയിലെടുത്ത് കോടതിയില്‍ ഹാജരാക്കി റിമാൻഡ് ചെയ്‌തിരുന്നു. അതിനിടെ ജയിലില്‍ വച്ച് ശ്രീമഹേഷ് ആത്മഹത്യയ്ക്ക് ശ്രമിക്കുകയും ചെയ്‌തു. ആത്മഹത്യ ശ്രമത്തിനിടെ ഗുരുതരമായി പരിക്കേറ്റ ഇയാൾ ഇപ്പോൾ ആലപ്പുഴ മെഡിക്കല്‍ കോളജ് ആശുപത്രിയില്‍ ചികിത്സയിലാണ്.
മഹേഷിന്‍റെ മൊഴി:ശ്രീമഹേഷ് ലക്ഷ്യമിട്ടത് കൂട്ടക്കൊലയ്ക്ക് ആണെന്നാണ് പൊലീസ് നല്‍കുന്ന വിവരം. ജൂണ്‍ ഏഴിന് വൈകിട്ട് വീട്ടിനുള്ളില്‍ വച്ചാണ് ശ്രീമഹേഷ് മകളെ വെട്ടിക്കൊലപ്പെടുത്തിയത്. മകൾ നക്ഷത്രയ്ക്ക് പുറമെ ഇയാളുടെ മാതാവ് സുനന്ദ, ശ്രീമഹേഷിന് പുനർ വിവാഹം ആലോചിച്ച പൊലീസ് ഉദ്യോഗസ്ഥ എന്നിവരെയും കൊലപ്പെടുത്താൻ ആയിരുന്നു പദ്ധതിയെന്ന് പൊലീസ് പറയുന്നു. മൂന്നു കൊലപാതകങ്ങൾ നടത്തിയ ശേഷം ആത്മഹത്യ ചെയ്യുക എന്നതായിരുന്നു ഇയാളുടെ ലക്ഷ്യമെന്നും പൊലീസ് പറയുന്നു.
പ്രതി ശ്രീമഹേഷിനെ മണിക്കൂറുകൾ ചോദ്യം ചെയ്‌തതിൽ നിന്നുമാണ് പൊലീസിന് ഞെട്ടിക്കുന്ന വിവരങ്ങൾ ലഭിച്ചത്. കൊലപാതകം മുൻകൂട്ടി ആസൂത്രണം ചെയ്‌താണ് ഇയാൾ സംഭവ ദിവസം വീട്ടിലെത്തിയത്. കൂട്ടക്കൊല നടത്താനായി പ്രതി ഓൺലൈൻ ആയി മഴു ഓർഡർ ചെയ്തെങ്കിലും അത് ലഭിക്കാതെ വന്നതോടെ പ്രത്യേകം പറഞ്ഞു ചെയ്യിക്കുകയായിരുന്നു. ഈ മഴു കൊണ്ടാണ് മകൾ നക്ഷത്രയെ വെട്ടിക്കൊലപ്പെടുത്തിയത്.
ശബ്‌ദം കേട്ട് ഓടിയെത്തിയ ഇയാളുടെ അമ്മയേയും ശ്രീമഹേഷ് വെട്ടിപ്പരിക്കേല്‍പ്പിച്ചു. ഇവർ ആശുപത്രിയില്‍ ചികിത്സയിലാണ്. തലയുടെ പിന്‍ഭാഗത്തേറ്റ ആഴത്തിലുള്ള മുറിവാണ് നക്ഷത്രയുടെ മരണത്തിന് കാരണമായത്.
ഭാര്യയുടെ മരണത്തിലും ദുരൂഹത:വിദേശത്തായിരുന്ന ശ്രീമഹേഷ് പിതാവ് ശ്രീഗണേഷ് ട്രെയിൻ തട്ടി മരിച്ചതിനെ തുടർന്നാണ് നാട്ടിൽ എത്തിയത്. ഇയാളുടെ ഭാര്യ വിദ്യ രണ്ടു വർഷം മുൻപ് വീട്ടിൽ വച്ച് ആത്മഹത്യ ചെയ്യുകയായിരുന്നു. വിദ്യയുടേത് ആത്മഹത്യയല്ല കൊലപാതകമാണെന്നാണ് നാട്ടുകാർ ഇപ്പോൾ ആരോപിക്കുന്നത്. ശ്രീമഹേഷ് വിദ്യയെ തുടർച്ചയായി ഉപദ്രവിച്ചിരുന്നതായും നാട്ടുകാർ പറയുന്നു.
ആത്മഹത്യ ശ്രമം, ശ്രീമഹേഷ് ഗുരുതരാവസ്ഥയില്‍:ജയിലില്‍ വച്ച് ആത്മഹത്യ ശ്രമം നടത്തിയ ശ്രീമഹേഷിന്‍റെ നില ഗുരുതരമായി തുടരുന്നു. നിലവില്‍ ഇയാള്‍ നിരീക്ഷണത്തിലാണെന്ന് ആശുപത്രി അധികൃതര്‍ അറിയിച്ചു. സെല്ലിലേക്ക് മാറ്റുന്നതിന് മുന്‍പായി രേഖകള്‍ ശരിയാക്കാന്‍ ജയില്‍ സൂപ്രണ്ടിന്‍റെ ഓഫിസിലേക്ക് എത്തിച്ചപ്പോഴായിരുന്നു ഇയാള്‍ ആത്മഹത്യയ്ക്ക് ശ്രമിച്ചത്.
More Read :പിതാവിന്‍റെ വെട്ടേറ്റ് ആറുവയസുകാരി കൊല്ലപ്പെട്ട സംഭവം; പ്രതി ജയിലിൽ ആത്മഹത്യയ്ക്ക് ശ്രമിച്ചു
തെളിവെടുപ്പിനിടെ നാട്ടുകാരുടെ പ്രതിഷേധം:മകളെ മഴുകൊണ്ട് വെട്ടിക്കൊലപ്പെടുത്തിയ കേസില്‍ പ്രതിയായ ശ്രീമഹേഷിനെ കഴിഞ്ഞ ദിവസം തെളിവെടുപ്പിനായി അന്വേഷണ സംഘം എത്തിച്ചിരുന്നു. കൃത്യം നടന്ന പുന്നമൂട് ആനക്കൂട്ടിൽ വീട്ടിലെത്തിച്ചായിരുന്നു തെളിവെടുപ്പ്. ശ്രീമഹേഷുമായി അന്വേഷണ സംഘം സ്ഥലത്തെത്തിയതിന് പിന്നാലെ വലിയ പ്രതിഷേധവുമായി നാട്ടുകാരും രംഗത്തെത്തിയിരുന്നു.
