ആലപ്പുഴ: കൊറോണ വൈറസ് ബാധ സ്ഥിരീകരിച്ചതിനെ തുടർന്ന് ആലപ്പുഴ മെഡിക്കൽ കോളജ് ആശുപത്രിയിലെ ഐസൊലേഷൻ വാർഡിൽ ചികിത്സയിൽ കഴിയുന്ന രോഗിയുടെ നില തൃപ്‌തികരമായി തുടരുന്നു. രോഗലക്ഷണങ്ങളോടെ ആശുപത്രിയിൽ കഴിഞ്ഞിരുന്ന രണ്ട് പേരെ കഴിഞ്ഞ ദിവസം ഡിസ്‌ചാർജ് ചെയ്‌തു. ഇവരെ വീടുകളിൽ നിരീക്ഷണത്തിൽ കഴിയുന്നവരുടെ പട്ടികയിൽ ഉൾപ്പെടുത്തി. അതേസമയം, പുതുതായി 15 പേരെ വീടുകളിൽ നിരീക്ഷണത്തിലാക്കിയിട്ടുണ്ട്. നിലവിൽ രണ്ട് പേരാണ് ആശുപത്രിയിൽ നിരീക്ഷണത്തിലുള്ളത്. വീടുകളിലും ആശുപത്രികളിലുമായി ആകെ 228 പേർ നിരീക്ഷണത്തിലുണ്ട്. 35 സാംപിളുകൾ പരിശോധനയ്ക്കായ് അയച്ചതിൽ 34 പേരുടേയും റിസൾട്ടുകൾ ലഭിച്ചു. 33 എണ്ണം നെഗറ്റീവ് ആണെന്ന് കണ്ടെത്തി.
ജില്ലാ മാനസികാരോഗ്യ പരിപാടിയുടെ നേതൃത്വത്തിൽ ആലപ്പുഴ റെയിൽവേ സ്റ്റേഷൻ, കെഎസ്ആർടിസി ബസ് സ്റ്റാന്‍റ്, ആലപ്പുഴ ബീച്ച് എന്നിവിടങ്ങളിൽ കൊറോണയുമായി ബന്ധപ്പെട്ട ലഘുനാടകം നടത്തി. ജില്ലയിൽ 14 ഗ്രാമസഭകളിൽ ബോധവത്ക്കരണ ക്ലാസുകൾ സംഘടിപ്പിച്ചു.