ടോക്കിയോ : പാരാലിമ്പിക്സിൽ വനിതകളുടെ 50 മീറ്റര്‍ റൈഫിള്‍ ത്രീ എസ്.എച്ച് വണ്‍ വിഭാഗത്തില്‍ വെങ്കലം നേടി ചരിത്ര നേട്ടം കുറിച്ച് ഇന്ത്യൻ താരം അവാനി ലേഖാര. പാരാലിമ്പിക്സിൽ ഇരട്ട മെഡൽ നേടുന്ന ആദ്യ ഇന്ത്യൻ വനിതയെന്ന റെക്കോർഡാണ് വെങ്കല നേട്ടത്തിലൂടെ താരം സ്വന്തമാക്കിയത്. നേരത്തെ വനിതകളുടെ 10 മീറ്റര്‍ എയര്‍ റൈഫിളില്‍ അവാനി സ്വര്‍ണം നേടിയിരുന്നു.
445.9 പോയിന്‍റ് നേടിയാണ് 50 മീറ്റര്‍ റൈഫിള്‍ വിഭാഗത്തിൽ അവാനി വെങ്കലം സ്വന്തമാക്കിയത്. ഈ ഇനത്തില്‍ ചൈനയുടെ സി.പി ഷാങ് സ്വര്‍ണവും ജര്‍മനിയുടെ ഹില്‍ട്രോപ്പ് വെള്ളിയും സ്വന്തമാക്കി. യോഗ്യതാ റൗണ്ടില്‍ രണ്ടാം സ്ഥാനം നേടിക്കൊണ്ടാണ് അവാനി ഫൈനലിലേക്ക് കടന്നത്.