ടോക്കിയോ : വനിതകളുടെ 62 കിലോഗ്രാം ഫ്രീസ്റ്റൈൽ ഗുസ്തിയിൽ ആദ്യത്തെ ഒളിമ്പിക്സ് മത്സരത്തിനിറങ്ങിയ ഇന്ത്യൻ താരം സോനം മാലിക്കിന് തോൽവി. മംഗോളിയയുടെ ബോലോർത്തുയ ഖുറേൽഖുവിനോടാണ് താരം തോറ്റത്.
ഒളിമ്പിക്സ് അരങ്ങേറ്റത്തിനിറങ്ങിയ സോനം പുഷ് ഔട്ട് പോയിന്‍റിലൂടെ രണ്ട് പോയിന്‍റ് നേടി മുന്നിലെത്തി. എന്നാൽ മത്സരത്തിന് 35 സെക്കന്‍റ് മാത്രം ശേഷിക്കെ ടേക്ക് ഡൗണ്‍ നീക്കത്തിലൂടെ രണ്ട് പോയിന്‍റ് മംഗോളിയൻ താരം നേടി. മത്സരം അവസാനിച്ചപ്പോൾ സ്കോർ 2-2 ൽ തുടർന്നു.
എന്നാൽ മാനദണ്ഡങ്ങളനുസരിച്ച് അവസാന പോയിന്‍റ് നേടിയത് ബോലോർത്തുയ ആയതിനാൽ താരത്തെ വിജയിയായി പ്രഖ്യാപിക്കുകയായിരുന്നു. തോറ്റെങ്കിലും സോനത്തിന് ഇനിയും മത്സരിക്കാൻ അവസരമുണ്ട്. മംഗോളിയന്‍ താരം ഫൈനലിൽ കടന്നാൽ സോനത്തിന് റെപഷാഗെ റൗണ്ടിൽ കളിക്കാൻ സാധിക്കും.