ടോക്കിയോ :ഒളിമ്പിക്‌സിൽ വനിതകളുടെ 1500 മീറ്റർ ഹീറ്റ്സിനിടെ കൂടെ ഓടിയ താരത്തെ തട്ടി നെതർലാൻഡ്‌സിന്‍റെ സിഫാൻ ഹസൻ ട്രാക്കിൽ വീണുപോയപ്പോൾ ഇനിയൊരു തിരിച്ചുവരവില്ലെന്നാകും മത്സരം കണ്ടുകൊണ്ടിരുന്നവര്‍ ചിന്തിച്ചിട്ടുണ്ടാകുക. എന്നാൽ പിന്നീട് കണ്ടത് ആരെയും അമ്പരപ്പിക്കുന്ന കുതിപ്പായിരുന്നു.
അസാധ്യമെന്ന് ഏവർക്കും തോന്നാവുന്ന പ്രകടനമാണ് ഞായറാഴ്‌ച നടന്ന ഹീറ്റ്സിൽ സിഫാൻ ഹസൻ കാഴ്‌ചവെച്ചത്. കെനിയൻ താരം ജെബിടോക്കുമായി കൂട്ടിയിടിച്ച് വീണതിന് ശേഷം ചാടി എഴുന്നേറ്റ് പിന്നിൽ നിന്ന് ഓടിക്കയറി ഹീറ്റ്സിൽ ഒന്നാമതായാണ് സിഫാൻ ഫിനിഷ് ചെയ്‌തത്. അതും 14.36.79 സെക്കന്‍റിൽ.
എന്നാൽ അത് മാത്രമായിരുന്നില്ല. വീണ് പരിക്കുപറ്റിക്കാണും എന്ന് ചിന്തിച്ചവരെ അത്ഭുതപ്പെടുത്തിക്കൊണ്ട് വൈകുന്നേരം നടന്ന 5000 മീറ്റർ ഫൈനലിൽ 14 മിനിറ്റ് 36.79 സെക്കന്‍റില്‍ ഓടിക്കയറി താരം സ്വർണം സ്വന്തമാക്കി.