ടോക്കിയോ :ടോക്കിയോയില്‍ നടക്കുന്ന പാരാലിമ്പിക്‌സില്‍ ഇന്ത്യയ്‌ക്ക് രണ്ടാം സ്വര്‍ണം. ജാവലിൻ ത്രോയിലൂടെ സുമിത് ആന്‍റിലാണ് പൊന്നണിഞ്ഞത്. 68.55 മീറ്റര്‍ ജാവലിന്‍ പായിച്ചാണ് സുമിത് രാജ്യത്തിന്‍റെ മെഡല്‍നേട്ടം ഏഴാക്കിയത്.
പുരുഷന്മാരുടെ എഫ് 64 വിഭാഗത്തില്‍ നടന്ന മത്സരത്തില്‍ ഓസ്‌ട്രേലിയൻ താരം മൈക്കള്‍ ബുരിയൻ (66.29 മീറ്റർ), ശ്രീലങ്കയുടെ ദുലൻ കൊടിതുവാക്കു (65.61 മീറ്റർ) എന്നിവർ യഥാക്രമം വെള്ളിയും വെങ്കലവും നേടി.
കാലുകൾ മുറിച്ചുമാറ്റിയതും കൃത്രിമ കാല്‍ ഘടിപ്പിച്ചവരുമായ കായികതാരങ്ങളെയാണ് എഫ് 64 ല്‍ പരിഗണിക്കുന്നത്.
അഞ്ചാമത്തെ ഊഴത്തിലാണ് ഈ 23 കാരൻ സ്വര്‍ണം എറിഞ്ഞുവീഴ്‌ത്തിയത്. ഹരിയാനയിലെ സോനെപത് സ്വദേശിയായ സുമിത് ആന്‍റിലിന് 2015 ൽ നടന്ന മോട്ടോർ ബൈക്ക് അപകടത്തെ തുടര്‍ന്നാണ് ഇടതുകാലിന്‍റെ മുട്ടിന് താഴെ നഷ്ടപ്പെട്ടത്.