ടോക്കിയോ : പാരാലിമ്പിക്‌സില്‍ വനിത ടേബിള്‍ ടെന്നിസില്‍ വെള്ളി നേടിയ ഭവിന പട്ടേലിന് മൂന്ന് കോടി രൂപ പരിതോഷികം പ്രഖ്യാപിച്ച് ഗുജറാത്ത് സർക്കാർ.
ഗുജറാത്ത് മുഖ്യമന്ത്രി വിജയ് രൂപാനിയാണ് ഇക്കാര്യം അറിയിച്ചത്. പാരാലിമ്പിക്‌ ചരിത്രത്തില്‍ ടേബിള്‍ ടെന്നിസിൽ ഇന്ത്യയ്ക്ക് ലഭിക്കുന്ന ആദ്യ മെഡലാണ് ഭവിന സ്വന്തമാക്കിയത്. ഗുജറാത്തിലെ മെഹ്സാന സ്വദേശിയാണ് താരം.
ദിവ്യാംഗ് ഖേല്‍ പ്രതിഭ പ്രോത്സാഹന്‍ പുരസ്‌കാര്‍ യോജനയുടെ കീഴിലാണ് ഭവിനയ്ക്ക് സമ്മാനത്തുക ലഭിക്കുക. ഇതിനുപുറമേ ടേബിള്‍ ടെന്നിസ് ഫെഡറേഷന്‍ ഓഫ് ഇന്ത്യയും ഭവിനയ്ക്ക് സമ്മാനത്തുക നല്‍കും. 31 ലക്ഷം രൂപയാണ് ടേബിള്‍ ടെന്നിസ് ഫെഡറേഷന്‍ ഭവിനയ്ക്ക് സമ്മാനിക്കുക.