വിംബിൾ‌ഡണ്‍ പുരുഷ സിം​ഗിൾസ്; റോജർ ഫെഡറർ പുറത്ത്

പോളണ്ടിന്‍റെ ഹ്യൂബർട്ട് ഹർക്കാസാണ് നേരിട്ടുള്ള സെറ്റുകൾക്ക് ഫെഡററെ പരാജയപ്പെടുത്തിയത്

ലണ്ടൻ:വിംബിൾ‌ഡണ്‍ പുരുഷ വിഭാ​ഗം സിം​ഗിൾസിൽ ക്വാർട്ടർ പോരാട്ടത്തിൽ ഇതിഹാസ താരം റോജർ ഫെഡറർ പുറത്ത്. ഒമ്പതാം കിരീടം തേടി വിംബിൾ‌ഡണിലെ സെന്‍റർ കോർട്ടിൽ ക്വാർട്ടർ പോരാട്ടത്തിനിറങ്ങിയ ഫെഡററെ നേരിട്ടുള്ള സെറ്റുകളിൽ വീഴ്ത്തി പോളണ്ടിന്‍റെ ഹ്യൂബർട്ട് ഹർക്കാസ് സെമിയിയിലെത്തി.

6-3, 7-6, 6-0 എന്ന സ്കോറിലാണ് ഫെഡററെ ഹർക്കാസ് വീഴ്ത്തിയത്. ഹർ‌ക്കാസിന്‍റെ ആദ്യ വിംബിൾഡൺ സെമി പ്രവേശനമാണിത്. ആദ്യ സെറ്റ് 6-3ന് നഷ്ടമായ ഫെഡറർ രണ്ടാം സെറ്റ് ടൈ ബ്രേക്കറിലെത്തിച്ചെങ്കിലും 7-6 എന്ന പോയിന്‍റിന് കൈവിടുകയായിരുന്നു.

മൂന്നാം സെറ്റിൽ തുടക്കം മുതൽ ഫെഡററുടെ സെർവുകൾ ബ്രേക്ക് ചെയ് മുന്നേറിയ ഹർക്കാസ് ഒരു തവണ മാത്രമാണ് സ്വന്തം സെർവിൽ ബ്രേക്ക് പോയിന്‍റ് നൽകിയത്. എന്നാൽ‌ അത് മുതലാക്കാൻ കഴിയാതിരുന്ന ഫെഡറർ 6-0ന് സെറ്റും മത്സരവും കൈവിടുകയായിരുന്നു.

പല നിർണായക പോയന്‍റുകളും അനാവശ്യ പിഴവിലൂടെ നഷ്ടമാക്കുന്ന ഫെഡററെയാണ് മത്സരത്തിലുടനീളം കാണാൻ സാധിച്ചത്. അവസാന സെറ്റിൽപ്പോലും പല അനായാസ പോയന്‍റുകളും അനാവശ്യമായി ഫെഡറർ കൈവിട്ട് കളഞ്ഞിരുന്നു.