പാരീസ്: യുഎസിന്‍റെ ലോക ഏഴാം സീഡ് സെറീന വില്യംസിന് നാളെ കളിമണ്‍ കോര്‍ട്ടില്‍ നിര്‍ണായക പോരാട്ടം. പ്രീ ക്വാര്‍ട്ടറില്‍ കസാകിസ്ഥാന്‍റെ 21-ാം സീഡ് എലേന റിബാക്കിനയാണ് എതിരാളി. ജയിക്കുന്നവര്‍ക്ക് ക്വാര്‍ട്ടര്‍ ബെര്‍ത്ത് ഉറപ്പാക്കാം. ഇന്നലെ നടന്ന മൂന്നാം റൗണ്ട് പോരാട്ടത്തില്‍ അമേരിക്കയുടെ തന്നെ ഡാനിയേല റോസ് കോളിന്‍സിനെ നേരിട്ടുള്ള സെറ്റുകള്‍ക്ക് തകര്‍ത്താണ് സെറീന മൂന്നാം റൗണ്ടിലേക്ക് മുന്നേറിയത്. സ്‌കോര്‍: 6-4, 6-4.
സെറീനക്കൊപ്പം വിക്‌ടോറിയ അസരങ്ക, റഷ്യയുടെ അനസ്‌താസിയ പവ്‌ല്യുചെങ്കോവ എന്നിവരും പ്രീക്വാര്‍ട്ടറില്‍ കടന്നു. മത്സരത്തിനിടെ പവ്‌ല്യുചെങ്കോവക്ക് പരിക്കേറ്റത് ആശങ്കയുണ്ടാക്കുന്നുണ്ട്. 24-ാം ഗ്രാന്‍ഡ് സ്ലാം കിരീടം ലക്ഷ്യമിട്ടാണ് സെറീന കളിമണ്‍ കോര്‍ട്ടിലേക്ക് എത്തിയിരിക്കുന്നത്. 2017ലാണ് സെറീന അവസാനമായൊരു ഗ്രാന്‍ഡ് സ്ലാം കിരീടത്തില്‍ മുത്തമിട്ടത്.