ലണ്ടൻ : വിംബിള്‍ഡണ്‍ ഈ പതിപ്പിലെ ഏറ്റവും മികച്ച മത്സരം. കൈവിട്ടെന്ന് തോന്നിപ്പിച്ച സാഹചര്യത്തിൽ പരിക്കിനെയും ടെയ്‌ലർ ഫ്രിറ്റ്‌സിനെയും മറികടന്ന് സെമിയിലെത്തി റാഫേൽ നദാൽ. സെന്റർ കോർട്ടിൽ ഒപ്പത്തിനൊപ്പം പോരാട്ടം കണ്ട മത്സരത്തിൽ അഞ്ചാം സെറ്റിൽ സൂപ്പർ ടൈബ്രേക്കറിലായിരുന്നു നദാലിന്‍റെ വിജയം. സ്‌കോർ: 3-6, 7-5, 3-6, 7-5, 7-6(10-4).
ആദ്യ സെറ്റില്‍ ഫ്രിറ്റ്‌സിനെ നദാല്‍ ബ്രേക്ക് ചെയ്‌തു. എന്നാൽ ശക്തമായി തിരിച്ചടിച്ച അമേരിക്കൻ താരം തുടര്‍ച്ചയായി അഞ്ച് ഗെയിം നേടി 6-3ന് സെറ്റ് സ്വന്തമാക്കി. രണ്ടാം സെറ്റിലും ഫ്രിറ്റ്‌സിന് ആയിരുന്നു ആധിപത്യം. ഒപ്പത്തിനൊപ്പം പോരാടിയ സെറ്റിൽ ഒടുവിൽ ഫ്രിറ്റ്‌സിന്‍റെ അവസാന സർവീസ് ആരാധകരുടെ നിറഞ്ഞ പിന്തുണയോടെ ബ്രേക്ക് ചെയ്‌ത നദാൽ സെറ്റ് 7-5 ന് സ്വന്തം പേരിൽ കുറിച്ചു.
രണ്ടാം സെറ്റിലെ നിരാശ, ബാധിക്കാത്ത പ്രകടനം ആണ് മൂന്നാം സെറ്റിൽ ഫ്രിറ്റ്സ് പുറത്തെടുത്തത്. ആദ്യം തന്നെ നദാലിന്‍റെ സർവീസ് ബ്രേക്ക് ചെയ്‌ത താരം തന്റെ മികവ് സെന്റർ കോർട്ടിൽ കാണിച്ചു. 6-3 ന് സെറ്റ് നേടിയ ഫ്രിറ്റ്സ് വീണ്ടും അട്ടിമറി പ്രതീക്ഷ ഉയര്‍ത്തി.നാലാം സെറ്റിലും ഒപ്പത്തിനൊപ്പമുള്ള പോരാട്ടം കണ്ടെങ്കിലും 7-5ന് സെറ്റ് സ്വന്തമാക്കി നദാല്‍ മത്സരം അവസാന സെറ്റിലേക്ക് നീട്ടി.