ലക്സംബര്ഗ്:യൂറോകപ്പ് യോഗ്യത റൗണ്ടിലെ തുടര്ച്ചയായ രണ്ടാം മത്സരത്തിലും വമ്പന് ജയവുമായി മുന് ചാമ്പ്യന്മാരായ പോര്ച്ചുഗല്. ഗ്രൂപ്പ് ജെ യിലെ പോരാട്ടത്തില് പറങ്കിപ്പടയുടെ തേരോട്ടത്തിന് മുന്നില് ലക്സംബര്ഗാണ് വീണത്. ലിച്ചന്സ്റ്റീനെതിരായ മത്സരത്തിന് പിന്നാലെ ലക്സംബര്ഗിനെതിരെയും ക്രിസ്റ്റ്യാനോ റൊണാള്ഡോ ഇരട്ടഗോളുമായി മിന്നിയപ്പോള് എതിരില്ലാത്ത 6 ഗോളിന്റെ വിജയം നേടാന് പോര്ച്ചുഗലിന് സാധിച്ചു.
റൊണാള്ഡോയെ കൂടാതെ ജാവൊ ഫെലിക്സ്, ബെര്ണാഡോ സില്വ, ഒട്ടാവിയോ, റാഫേല് ലിയോ എന്നിവരും പറങ്കിപ്പടയ്ക്കായി ഗോള് നേടി. ലക്സംബര്ഗിനെതിരായ മത്സരത്തില് സൂപ്പര്താരം ക്രിസ്റ്റ്യാനോ റൊണാള്ഡോയിലൂടെയാണ് പോര്ച്ചുഗല് ഗോള് വേട്ട തുടങ്ങിയത്. തുടക്കം മുതല് എതിര് ഗോള് മുഖത്തേക്ക് പാഞ്ഞെത്തിയ പറങ്കിപ്പടയ്ക്ക് 9-ാം മിനിട്ടില് തന്നെ ആദ്യ ഗോള് നേടാനായി.
തൊട്ടുപിന്നാലെ 15-ാം മിനിട്ടില് പോര്ച്ചുഗല് രണ്ടാം ഗോളും നേടി. ജാവൊ ഫെലിക്സ് ആയിരുന്നു പോര്ച്ചുഗലിന്റെ ലീഡ് ഉയര്ത്തിയത്. ഈ ഗോളാഘോഷം അവസാനിക്കുന്നതിന് മുന്പ് തന്നെ പോര്ച്ചുഗല് വീണ്ടും ലക്സംബര്ഗ് വലയില് പന്തെത്തിച്ചു.
ഇത്തവണ ബെര്ണാഡോ സില്വ ആയിരുന്നു ഗോള് സ്കോറര്. 18-ാം മിനിട്ടിലാണ് പോര്ച്ചുഗല് മൂന്നാം ഗോള് നേടിയത്. മത്സരത്തിന്റെ ആദ്യ 20 മിനിട്ടിനുള്ളില് തന്നെ മൂന്ന് ഗോളടിച്ച പറങ്കിപ്പട 31-ാം മിനിട്ടില് ലീഡ് നാലാക്കി ഉയര്ത്തി.
സൂപ്പര് താരം ക്രിസ്റ്റ്യാനോ റൊണാള്ഡോയിലൂടെ ആയിരുന്നു അവര് ലീഡ് വീണ്ടും ഉയര്ത്തിയത്. അന്താരാഷ്ട്ര കരിയറില് റൊണാള്ഡോയുടെ 122-ാം ഗോള് ആയിരുന്നു ഇത്. ഇതോടെ നാല് ഗോള് ലീഡുമായാണ് പോര്ച്ചുഗല് ലക്സംബര്ഗിനെതിരായ മത്സരത്തിന്റെ ഒന്നാം പകുതി അവസാനിപ്പിച്ചത്.
മത്സരത്തിന്റെ 65-ാം മിനിട്ടില് ഇരട്ടഗോള് നേടിയ റൊണാള്ഡോയെ പിന്വലിച്ച് ഗോണ്സാലോ റാമോസിനെ പരിശീലകന് റോബര്ട്ടോ മാര്ട്ടിനെസ് കളത്തിലിറക്കി. പിന്നാലെ 77-ാം മിനിട്ടില് ഒട്ടാവിയോ പോര്ച്ചുഗല് അഞ്ചാം ഗോള് നേടി.