ലണ്ടന്‍ : ഇംഗ്ലീഷ് പ്രീമിയർ ലീഗില്‍ ക്രിസ്റ്റല്‍ പാലസിനെതിരായ പോരാട്ടത്തിന്‍റെ രണ്ടാം പകുതിയിലുണ്ടായ ഉന്തിനും തള്ളിനുമൊടുവില്‍ മഞ്ചസ്റ്റര്‍ യുണൈറ്റഡ് താരം കാസെമിറോയ്‌ക്ക് ചുവപ്പ് കാര്‍ഡ് ലഭിച്ചിരുന്നു. പ്രീമിയര്‍ ലീഗില്‍ താരത്തിന്‍റെ ആദ്യ ചുവപ്പുകാര്‍ഡായിരുന്നു ഇത്. യുണൈറ്റഡ് വിങ്ങര്‍ അന്‍റണിയെ ക്രിസ്റ്റല്‍ പാലസ് താരം ജെഫ്രി ഫൗള്‍ ചെയ്‌തതിന് പിന്നാലെ ഇരു ടീമിലേയും താരങ്ങള്‍ ഏറ്റുമുട്ടിയിരുന്നു.
ഇതിനിടെ പാലസ് താരം വിൽ ഹ്യൂസിന്‍റെ കഴുത്തില്‍ കാസെമിറോ പിടിച്ചിരുന്നു. വാര്‍ പരിശോധനയിലൂടെയാണ് 30കാരന് റഫറി ചുവപ്പ് കാര്‍ഡ് വിധിച്ചത്. ഇതോടെ മാഞ്ചസ്റ്റർ യുണൈറ്റഡിന്‍റെ അടുത്ത മൂന്ന് മത്സരങ്ങൾ വരെ താരത്തിന് നഷ്‌ടമായേക്കും.
സംഭവത്തിന്‍റെ ദൃശ്യം സോഷ്യല്‍ മീഡിയയില്‍ വൈറലാണ്. അതേസമയം മത്സരത്തില്‍ ക്രിസ്റ്റൽ പാലസിനെ തോല്‍പ്പിച്ച യുണൈറ്റഡ് പോയിന്‍റ് പട്ടികയില്‍ മൂന്നാം സ്ഥാനത്തേക്ക് കയറിയിരുന്നു. സ്വന്തം തട്ടകമായ ഓള്‍ഡ് ട്രഫോര്‍ഡില്‍ ഒന്നിനെതിരെ രണ്ട് ഗോളുകള്‍ക്കാണ് യുണൈറ്റഡ് പാലസിനെ വീഴ്‌ത്തിയത്.