ലണ്ടന്‍: ഇംഗീഷ് പ്രീമിയര്‍ ലീഗില്‍ ജയം തുടര്‍ന്ന് ചെല്‍സിയും ആഴ്‌സണലും. ന്യൂകാസിലിനെതിരെ ഏകപക്ഷീയമായ ഒരു ഗോളിനാണ് ചെല്‍സിയുടെ ജയം. സ്വന്തം തട്ടകമായ സ്റ്റാംഫോർഡ് ബ്രിഡ്‌ജില്‍ നടന്ന മത്സരത്തില്‍ കായ് ഹാവര്‍ട്‌സാണ് നീലക്കുപ്പായക്കാരുടെ വിജയ ഗോള്‍ നേടിയത്.
മത്സരത്തിന്‍റെ 73 ശതമാനവും പന്ത് കൈവശംവെച്ചുവെങ്കിലും 89ാം മിനിട്ടിലാണ് ചെല്‍സിക്ക് ഗോള്‍ നേടാനായത്. ലീഗില്‍ ചെല്‍സിയുടെ തുടര്‍ച്ചയായ അഞ്ചാം ജയമാണിത്. 28 മത്സരങ്ങളില്‍ നിന്നും 59 പോയിന്‍റോടെ മൂന്നാം സ്ഥാനത്താണ് സംഘമുള്ളത്. 28 മത്സരങ്ങളില്‍ 31 പോയിന്‍റുമായി ന്യൂകാസില്‍ 14ാം സ്ഥാനത്താണ്.