കോഴിക്കോട്:ഖത്തറില്‍ ഫുട്ബോള് ലോകകപ്പിന് പന്തുരുളാന്‍ ദിവസങ്ങള്‍ മാത്രം ബാക്കി നില്‍ക്കെ കേരളത്തില്‍ അതിന്‍റെ ആവേശം ദിനംതോറും ഉയരുകയാണ്. എല്ലാ വര്‍ഷങ്ങളിലേയും പോലെ ഇപ്രാവശ്യവും അര്‍ജന്‍റീന - ബ്രസീല്‍ ആരാധകര്‍ തന്നെയാണ് കേരളത്തിലെ ഫുട്ബോള് ആഘോഷങ്ങള്‍ക്ക് വേണ്ടി മുന്‍പന്തിയില്‍. കോഴിക്കോട് പുള്ളാവൂരില്‍ അര്‍ജന്‍റീന ആരാധകര്‍ സൂപ്പര്‍ താരം ലയണല്‍ മെസിയുടെ കൂറ്റന്‍ കട്ടൗട്ട് ചെറുപുഴയില്‍ സ്ഥാപിച്ചിരുന്നു.
പുള്ളാവൂരില്‍ നെയ്‌മറുടെ കൂറ്റന്‍ കട്ടൗട്ട് സ്ഥാപിച്ച് ബ്രസീല്‍ ആരാധകര്‍
അതിന് മറുപടിയായി രംഗത്തെത്തിയിരിക്കുകയാണ് പ്രദേശത്തെ ബ്രസീല്‍ ആരാധകരിപ്പോള്‍. മെസിപ്പട സ്ഥാപിച്ച കട്ടൗട്ടിന് മുന്നിലാണ് 'സുല്‍ത്താന്‍' ആരാധകര്‍ ഇഷ്‌ടതാരത്തിന്‍റെ കട്ടൗട്ട് സ്ഥാപിച്ചത്. 35 അടി ഉയരമാണ് ബ്രസീല്‍ സൂപ്പര്‍ താരത്തിന്‍റെ കട്ടൗട്ടിനുള്ളത്. വലിയ ആഘോഷത്തോടെയാണ് ബ്രസീല്‍ ആരാധകര്‍ നെയ്‌മറുടെ കട്ടൗട്ട് സ്ഥാപിക്കാനെത്തിയത്.