കൊച്ചി: ചാമ്പ്യന്‍ കോച്ച് ഇവാന്‍ വുകോമനോവിച്ച് കേരള ബ്ലാസ്‌റ്റേഴ്‌സിനൊപ്പം തുടരും. ബ്ലാസ്‌റ്റേഴ്‌സുമായുള്ള കരാര്‍ വുകോമനോവിച്ച് 3 വര്‍ഷത്തേക്ക് കൂടി പുതുക്കി. ഇതോടെ 2025 വരെ അദ്ദേഹം ടീമിനൊപ്പമുണ്ടാവും.
കഴിഞ്ഞ സീസണില്‍ ടീമിനെ ഫൈനലിലെത്തിക്കാന്‍ സെര്‍ബിയക്കാരനായ വുകോമനോവിച്ചിന് സാധിച്ചിരുന്നു. വുകോമനോവിച്ചിന് കീഴില്‍ സീസണില്‍ 10-മത്സരങ്ങളില്‍ അപരാജിത കുതിപ്പ് നടത്തി ചരിത്രം തീര്‍ക്കാനും ക്ലബിനായി. ടീമിനൊപ്പമുള്ള ഓരോരുത്തരുടേയും പോസിറ്റീവ് മനോഭാവവും, ആരാധകര്‍ നല്‍കുന്ന ഊര്‍ജവും കണ്ടപ്പോള്‍ തന്നെ ടീമിനൊപ്പം തുടരണമെന്ന് ഉറപ്പിച്ചിരുന്നുവെന്ന് കരാര്‍ ഒപ്പിട്ടതിന് പിന്നാലെ വുകോമനോവിച്ച് പ്രതികരിച്ചു.