ഭുവനേശ്വര്‍:ഹോക്കി ലോകകപ്പില്‍ നിന്നും ആതിഥേയരായ ഇന്ത്യ ക്വാര്‍ട്ടര്‍ കാണാതെ പുറത്ത്. ക്രോസ് ഓവര്‍ മത്സരത്തില്‍ പിന്നില്‍ നിന്നും തിരിച്ചടിച്ച് കയറിയ ന്യൂസിലന്‍ഡ് സഡന്‍ ഡെത്തിലാണ് ഇന്ത്യയെ പരാജയപ്പെടുത്തിയത്. നാലിനെതിരെ അഞ്ച് ഗോളിനാണ് കിവീസ് ഇന്ത്യയെ തകര്‍ത്തത്.
മത്സരത്തില്‍ 3-1ന് മുന്നില്‍ നിന്ന ഇന്ത്യക്കെതിരെ ആറ് മിനിട്ടിനിടെയാണ് ന്യൂസിലന്‍ഡ് രണ്ട് ഗോളുകള്‍ തിരിച്ചടിച്ചത്. ലളിത് കുമാര്‍ ഉപാധ്യയ്, സുഖ്‌ജീത് സിങ്, വരുണ്‍ കുമാര്‍ എന്നിവരായിരുന്നു ഇന്ത്യയുടെ ഗോള്‍ സ്‌കോറര്‍മാര്‍. ലെയ്ന്‍ സാം, റസ്സല്‍ കെയ്ന്‍, ഫിന്‍ഡ്‌ലെ സീന്‍ എന്നിവരുടെ ഗോളുകളിലൂടെയാണ് കിവീസ് ഇന്ത്യക്ക് മറുപടി നല്‍കിയത്.
മത്സരത്തിന്‍റെ ആദ്യ ക്വാര്‍ട്ടറില്‍ ഇരു ടീമിനും ഗോളൊന്നും നേടാന്‍ സാധിച്ചിരുന്നില്ല. ഇന്ത്യക്കഅ അനുകൂലമായി പെനാല്‍റ്റി കോര്‍ണര്‍ ലഭിച്ചെങ്കിലും ഹര്‍മന്‍പ്രീത് സിങ്ങിന്‍റെ ഫ്ലിക്കിന് ന്യൂസിലന്‍ഡ് ഗോള്‍കീപ്പര്‍ ലിയോണ്‍ ഹെയ്‌വാര്‍ഡിനെ കടന്ന് പോകാന്‍ സാധിച്ചില്ല. രണ്ടാം ക്വാര്‍ട്ടറിലാണ് ഇന്ത്യ ലീഡ് നേടിയത്.
ആകാശ്‌ദീപിന്‍റെ നേതൃത്വത്തില്‍ നടത്തിയ കൗണ്ടര്‍ അറ്റാക്കിനൊടുവില്‍ ലളിത് കുമാര്‍ എതിര്‍ ഗോള്‍ വല കുലുക്കുകയായിരുന്നു. 24ാം മിനിട്ടില്‍ പെനാല്‍റ്റി കോര്‍ണര്‍ ലക്ഷ്യത്തിലെത്തിച്ച സുഖ്‌ജീത് സിങ് ഇന്ത്യയുടെ ലീഡുയര്‍ത്തി. എന്നാല്‍ 28-ാം മിനിട്ടില്‍ ലെയ്ന്‍ സാമിലൂടെ ന്യൂസിലന്‍ഡ് ഒരു ഗോള്‍ മടക്കി.