പാരീസ് : റോളണ്ട് ഗാരോസിലെ കളിമൺ കോർട്ടിലെ ഒരേയൊരു രാജാവെന്ന് അടിവരയിട്ട് തെളിയിക്കുന്ന പ്രകടനവുമായി റാഫേല്‍ നദാല്‍. മോശം ഫോമും പരിക്കും അലട്ടുന്ന സമയത്തും ഇഷ്‌ടവേദിയായ ഫ്രഞ്ച് ഓപ്പണിന്‍റെ കളിത്തട്ടിൽ വിജയതീരമണിഞ്ഞിരിക്കുകയാണ് റാഫ. ഒന്നാം സീഡും ലോക ഒന്നാം നമ്പറുമായ നൊവാക് ജ്യോക്കോവിച്ചിനെ നാലുമണിക്കൂര്‍ നീണ്ട അത്യുഗ്രന്‍ പോരാട്ടത്തിനൊടുവിലാണ് 13 തവണ ഫ്രഞ്ച് ഓപ്പണ്‍ ജേതാവായ നദാല്‍ തകർത്തെറിഞ്ഞത്. സ്കോർ : 6-2, 4-6, 6-2, 7-6
ക്വാര്‍ട്ടര്‍ ഫൈനലില്‍ ആരാധകർ ആവേശത്തോടെ കാത്തിരുന്ന പോരാട്ടത്തിൽ തകർപ്പൻ പോരാട്ടവീര്യമാണ് ഇരു താരങ്ങളും പുറത്തെടുത്തത്. ഫ്രഞ്ച് ഓപ്പണില്‍ വെറും മൂന്നുതവണ മാത്രം തോല്‍വി വഴങ്ങിയ നദാലിനെ രണ്ടുതവണയും തോല്‍പ്പിച്ചത് ജ്യോക്കോവിച്ചാണ്. കഴിഞ്ഞ വര്‍ഷം സെമി ഫൈനലിൽ നദാലിനെ മറികടന്ന ജ്യോക്കോവിച്ച് ഫൈനലിൽ സിറ്റ്‌സിപാസിനെ കീഴടക്കി കിരീടം നേടിയിരുന്നു. ജയം ആവര്‍ത്തിക്കാന്‍ ജ്യോക്കോവിച്ച് എത്തിയപ്പോള്‍ പ്രതികാരം തേടിയാണ് റാഫ തന്‍റെ ഇഷ്‌ട മൈതാനത്ത് റാക്കറ്റേന്തിയത്.
ജ്യോക്കോവിച്ചിന്‍റെ ആദ്യ സര്‍വീസ് തന്നെ ബ്രേക്ക് ചെയ്‌ത നദാലിന് അത്യുഗ്രന്‍ തുടക്കമാണ് ലഭിച്ചത്. തുടര്‍ന്ന് കളിയിലേക്ക് തിരിച്ചുവരാന്‍ പൊരുതിയ സെര്‍ബിയന്‍ താരത്തെ ഒരിക്കല്‍ കൂടി ബ്രേക്ക് ചെയ്‌ത നദാല്‍ 52 മിനിറ്റ് പോരാട്ടത്തിനുശേഷം 6-2 ന് സെറ്റ് സ്വന്തമാക്കി. നദാലിന്‍റെ ഫോര്‍ഹാന്‍ഡുകള്‍ ജ്യോക്കോവിച്ചിന്‍റെ പ്രതിരോധം തകര്‍ക്കുന്ന കാഴ്‌ച മത്സരത്തില്‍ ഉടനീളവും കാണാനായി.
രണ്ടാം സെറ്റിലും സമാനമായ തുടക്കം ലഭിച്ച നദാൽ ജ്യോക്കോവിച്ചിന്‍റെ ആദ്യ സര്‍വീസ് തന്നെ ബ്രേക്ക് ചെയ്‌ത് 3-0 ന് മുന്നിലെത്തി. പിന്നീട് മികവിലേക്ക് ഉയര്‍ന്ന ജ്യോക്കോവിച്ച് കളിയിലേക്ക് അവിശ്വസനീയമായ വിധത്തിൽ തിരിച്ചുവന്നു. നദാലിനെ തുടര്‍ച്ചയായി ബ്രേക്ക് ചെയ്‌ത ജ്യോക്കോവിച്ച് 88 മിനിറ്റുകള്‍ നീണ്ട കടുത്ത പോരാട്ടത്തിന് ഒടുവില്‍ 6-4 ന് സെറ്റ് കൈയിലാക്കി മത്സരത്തില്‍ ഒപ്പമെത്തി.